KONIMA eshi David a hovela okupangela muJerusalem, Jehova okwa li e mu pa natango omafindano mahapu. Jehova okwa li a udaneka kutya ota ka yandja edu laKanaan kOvaisrael. Onghee hano, okwa li a kwafela David a kwate ko Kanaan ashishe, nohauxuuninwa, edu laKanaan alishe ola ninga lOvaisrael ngaashi Jehova a li a udaneka.

David okwa li omupangeli muwa, nokwa li e hole Jehova. Onghee hano, eshi David a kwata ko Jerusalem, okwa etifa tetetete oshikefa shaJehova shehangano muJerusalem. Okwa li nokuli a hala okutungila Jehova otembeli, opo mu tulwe oshikefa shehangano.

Konima eshi David a ninga omunamido, okwa li a ninga epuko la kula. David okwa li e shi shii kutya osha puka okulikufila oshinima shihe fi shoye. Ndele efiku limwe komatango fimbo a li kombada yongulu mombala, okwa li ta vandamene pedu ndele ta mono po omukainhu muwa. Edina laye oBatseba. Omushamane waBatseba okwa li Uria nokwa li umwe womovakwaita vaDavid.

David okwa li a hokwa Batseba neenghono, nomolwaasho okwa tuma a ka talwe e uye kombala yaye. Efimbo olo, omushamane waBatseba okwa li koita. David okwa nangala naBatseba, nolwanima Batseba okwa ninga oufimba. Eshi David e shi uda, okwa li a tila neenghono, nomolwaasho okwa tuma ondaka kuJoab, omukulunhu wetanga laye lovakwaita, tai ti kutya na tule Uria komesho molwoodi opo a file mo. Eshi Uria a fya, David okwa ka hombola po Batseba.

Jehova okwa li a handukila David neenghono. Onghee hano, okwa tuma omupiya waye Natan a ka nyaneke pomutenya oilonga ii oyo David a li a longa. Tala eshi Natan ta popi naDavid mefano olo. David okwa li e livela ombedi shili, nomolwaasho Jehova ka li e mu tokolela efyo. Ndele nande ongaho, Jehova okwa lombwela David a ti: ‘Meumbo loye otamu ka holoka omaupyakadi mahapu, molwaashi owa longa oilonga ii.’ Konima yefimbo, David okwa ka hangwa shili komaupyakadi mahapu.

Shotete, okamonamati kavo naBatseba oka fya. Oshitivali, omonamati waDavid woshiveli, Amnon, okwa li a hanga omumwainakadona Tamar oye aeke, ndele te mu kwata onghonga. Oshititatu, eshi omonamati waDavid, Absalom e shi uda, okwa li a kwatwa kehandu neenghono, ndele ta dipaa Amnon. Oshitine, Absalom okwa li e holike kovanhu vahapu, ndele te liningi ohamba ye mwene. Hauxuuninwa, David okwa ka findana olwoodi olo la li pokati kaye naAbsalom, na Absalom okwa dipawa. David ka li tuu shili a hangwa komaupyakadi mahapu!

Lwopokati opo, Batseba okwa ka dala vali okamati kamwe. Edina lako oSalomo. Ndele eshi David a kulupa nokwa li ta vele, omonamati waye Adonai okwa li ta kendabala okulininga ohamba. Opo nee David okwa lombwela omupristeri Zadok a vaeke Salomo oye a ka ninge ohamba. Diva konima yaasho, David okwa ka fya e na omido 70. Okwa li a pangela oule womido 40. Omonamati waye, Salomo, oye a ka ninga ohamba yOvaisrael.