DAVIDA byo atendekele kulama mu Yelusalema, Yehoba wakwashishe nzhita yanji kushinda balwanyi babo bavula bingi. Yehoba walayile bena Isalela kwibapa ntanda ya Kenana. Kabiji na bukwasho bwa Yehoba, ntanda yonse yo ebalayile kutambula yaikele pano ke yabo.

Davida wajinga ntangi wawama. Watemenwe bingi Yehoba. Onkao mambo, kintu kitanshi kyo aubile panyuma ya kutambula Yelusalema ke kuleta jikwachi ja lulayañano lwa Yehoba mu uno muzhi. Kabiji wakebelenga kushimika nzubo ya Lesa mwa kwijibika.

Davida byo akomene, walengele mambo. Wayukile’mba kyatama kusenda kintu kyabula kyanji. Bino, juba jimo mabanga, byo ajinga peulu ya mutenge wa nzubo yanji, watajile panshi ne kumona mwanamukazhi walambile bingi. Jizhina janji wajinga Batesheba kabiji mwata wanji wajinga Uliya, umo wa bashilikale banji.

Davida wamukebeshe bingi Batesheba kabiji ne kumuleta bamuletele ku jilapa janji ja bufumu. Mwata wanji wayile na kulwa nkondo. Davida walengele nanji mambo kabiji palutwe kacheche, waishile kutana’mba waimita. Davida wapopomenwe bingi kabiji watumine jiwi ku mukulumpe wa nzhita yanji, aye Yoaba amba bamubike Uliya kulutwe ya ko balwijilenga nkondo kuba’mba bamwipaye. Uliya byo afwile, Davida wasongwele Batesheba.

Yehoba wamuzhingijile bingi Davida. Onkao mambo, watumine kalume wanji, aye Natana kwi Davida kuya na kumubula mambo anji o alengele. Akimona Natana byo aambilenga kwi Davida papo. Davida waswile mambo o aubile ne kulapila, ne mu jino jishinda, Yehoba kechi wamwipayile ne. Bino, Yehoba waambile’mba: ‘Na mambo a kuba wauba bino bintu byatama, ukekala na makatazho avula mu nzubo yobe.’ Kya kine, Davida wapichile mu makatazho!

Patanshitu, mwana Batesheba wafwile. Kya bubiji, mubeji wa kwa Davida, aye Aminona wamwichile nyenga yanji, aye Tamala ne kumukanjikizha kulenga nanji mambo. Na mambo a kino kyaubiwe, Abisalomo mwana Davida wazhingijile bingi ne kumwipaya Aminona. Palutwe kacheche, Abisalomo waishile kwikala na bantu bavula bingi kabiji wialwile ke mfumu aye mwine. Kyapeleleko, Davida washinjile Abisalomo mu nkondo kabiji Abisalomo waipayiwe. Ee kine, Davida wajinga na makatazho.

Kimye kyamwekelenga bino byonse, Batesheba wasemene mwana ne kumutumba jizhina amba Solomone. Davida byo ajinga mukote ne kubela, mwananji, aye Adoniya wakebelenga kwikala mfumu. Pa kyonkakya kimye, Davida waambijile Zadoka, ñanga wa Lesa kwitulwila manyi ku mutwe wa kwa Solomone kumwesha’mba Solomone ye ukekala mfumu. Kechi papichile ne moba avula ne, Davida wafwile saka aji na myaka ya kusemwa 70. Walamine pa myaka 40, bino pa kyokya kimye Solomone waikele pano ke mfumu wa bena Isalela.