WE DEVID bigin rul na Jerusɛlɛm, Jiova mek in sojaman dɛn win bɔku fɛt. Jiova bin dɔn prɔmis fɔ gi di Izrɛlayt dɛn di land we de na Kenan. So naw Jiova ɛp dɛn fɔ gɛt ɔl di land we i bin dɔn prɔmis dɛn.

Devid na gud kiŋ. I lɛk Jiova. Yu no wan pan di fɔs tin dɛn we Devid du afta i fɛt ɛn win Jerusɛlɛm? I kam wit di oli bɔks na Jerusɛlɛm. Ɛn i bin want bil wan big os fɔ put di oli bɔks.

Wan tɛm Devid du wan bad tin. Devid no se i bad fɔ tek sɔntin we nɔto yu yon. Bɔt wan ivintɛm, we i bin de ɔp in os, i luk dɔŋ ɛn si wan fayn uman. Di uman nem Batshiba, ɛn in man na wan pan Devid in sojaman dɛn we nem Yuraya.

Devid bin want Batshiba bad, so i mek dɛn kam wit am na in os. Batshiba in man bin dɔn go fɛt wɔ. So Devid ledɔm wit Batshiba, ɛn leta Batshiba gɛt bɛlɛ. Dis mek Devid wɔri. So i sɛn mɛsej to Joab we na di bigman fɔ ɔl in sojaman dɛn. Devid tɛl am mek i put Yuraya bifo bifo usay dɛn de fɛt so dat dɛn go kil am. We Yuraya day, Devid mared Batshiba.

Jiova vɛks bad pan Devid. So i sɛn in savant we nem Netan, fɔ go tɛl Devid bɔt di bad tin dɛn we i dɔn du. Na Netan de tɔk to Devid so na di pikchɔ. Devid fil bad fɔ wetin i dɔn du, ɛn na dat mek Jiova nɔ kil am. Bɔt Jiova tɛl am se: ‘Bikɔs yu dɔn du dɛn bad tin ya, yu go gɛt bɔku trɔbul na yu os.’ Ɛn nɔto smɔl trɔbul Devid bin gɛt!

Fɔs, di pikin we Batshiba bɔn, day. Dɔn, Devid in fɔs bɔy pikin we na Amɔn, rep in sista we nem Tama. Dis mek Devid in ɔda pikin we na Absalɔn vɛks ɛn kil Amɔn. Leta, Absalɔn mek bɔku pipul dɛn lɛk am, ɛn di pipul dɛn mek am kiŋ. Aftaɔl dis, Devid win Absalɔn we dɛn go fɛt, ɛn dɛn kil Absalɔn. Fɔ tru, Devid bin gɛt bɔku trɔbul na in os.

We ɔl dis de bi, Batshiba bɔn wan bɔy pikin we nem Sɔlɔmɔn. We Devid bin dɔn ol ɛn sik, in pikin we nem Adonija tray fɔ mek insɛf kiŋ. So Devid mek wan prist we nem Zedɔk, tɔn ɔyl na Sɔlɔmɔn in ed fɔ sho se na Sɔlɔmɔn go bi kiŋ. I nɔ tu te, Devid day. I bin ol 70 ia. I bin dɔn rul fɔ 40 ia, bɔt naw na Sɔlɔmɔn na di kiŋ na Izrɛl.