KUTUNDA apa ana tameke Ndafita kupangera moJerusarema, Jehova ta pe vakwayita vendi mafundo gomanzi kononkore dawo. Jehova kwa tumbwidilire kupa Vaisraeli sirongo saKanani. Ano ngesi, nekwafo lyaJehova, sirongo nasinye esi va va tumbwidilire sina ya kara nye sawo.

Ndafita mupangeli gomuwa. Age kwa hara Jehova. Sininke simwe somuhowo esi ana rugana konyima zokukwata Jerusarema kuna kara sokureta sikesa saJehova segwanekero mositata oso. Age ana hara hena kutunga ntembeli omu na si tura.

Ndafita apa ana ya kuru, ta rugana epuko lyedona. Ndafita ga diva asi ayo epuko kugusa sininke somuntu nagepeke. Nye ngurova zimwe, apa ana kara keguru lyombara zendi, ta tara pevhu nokumona mukadi gomuwa. Edina lyendi yige Bateseba, ano mugara gwendi gumwe govakwayita vaNdafita gedina Uliya.

Ndafita ta hara Bateseba unene makura ta ninki va mu rete mombara zendi. Mugara gwendi age koyita. Ndafita ta rara nage ano konyima Bateseba ta yi nongonona asi ta ka gwana munona. Ndafita ta kara nosinka unene makura ta tumu eraka komukurona govakwayita Jowabu asi a ture Uliya komeho zomarwiro oku nava mu dipaga. Apa ana fu Uliya, Ndafita ta kwara Bateseba.

Jehova ta handukire Ndafita unene. Ta mu tumine mukareli gwendi Natana a ka mu tantere kuhamena nonzo dendi. Apa to mono Natana ana kuuyungisa Ndafita. Ndafita ta livere unene kweyi ana rugana, makura Jehova kapi ga mu dipagere. Nye Jehova ta tanta asi: ‘Morwa ono rugana yininke yoyidona eyi, ngo kara nomaudigu gomanzi membo lyoge.’ Ee, maudigu musi ana kara nago Ndafita!

Pomuhowo, munaBateseba ta fu. Kutunda opo mbeli zaNdafita Amunoni ta ka kara gelike namumbyendi gomukadona Tamara nokumusininika va rare kumwe. Eyi tayi handukisa unene munaNdafita Abisaromo, makura ta dipaga Amunoni. Konyima, Abisaromo ta ninki vantu wovanzi va mu hare, makura ta litura mwene mouhompa. Mouhura, Ndafita ta fundu yita yokurwa naAbisaromo, ogu va dipagere. Yimo, Ndafita kwa kere nomaudigu gomanzi.

Mwanayinye eyi, Bateseba ta hampuruka muna gomugara gedina Saromo. Ndafita apa ana kurupa age kuna kuvera, munwendi Adoniya ta litura mwene mouhompa. Opo Ndafita makura ta ninki mupristeli gedina Sadoko a tjire magadi pomutwe gwaSaromo a likide asi Saromo yige na kara hompa. Konyima tupu zosiruwogona Ndafita ta fu age ana kara nonomvhura 70. Age kwa pangerere nomvhura 40, nye ngesi Saromo yige nye hompa gwaIsraeli gomupe.

2 Samwere 11:1-27; 12:1-18; 1 Vahompa 1:1-48.