PANUMA Dafidi atatika ukuteka mu Jelusalemi, baYehoba bapela ifita fyakwe ukucimfya ukwingi pa filwani fyabo. BaYehoba balilaile ukupela icalo ca Kanani ku baIsilaeli. Pano, mukuba ne kofwa kwa baYehoba, conse’calo ici babalaile mukupelako caba cabo.

Dafidi ni mfumu iiweme. Alitemenwe baYehoba. Popele icintu cimo ici atatikilapo ukucita panuma ya kupoka Jelusalemi kuleta imbokosi ya kulayana iya baYehoba kulya. Kabili alukufwaya ukwibaka itempuli umwa kuibika.

Ili Dafidi akula, acite’cilubo icikulu. Dafidi alisi ati cibipile ukupinte’cintu ica muntu umbi. Pano icingulo cimo, ili ali pa mutenge wa cipango cakwe, alolesya pansi ne kubona umwanakasi uwakuti ubulombe. Isina lyakwe ni Batasyeba, ne mulume wakwe ni umo uwa fita fyakwe uwailicilwe ati Uliya.

Dafidi alukufwaisya Batasyeba icakweba’ti atuma abakumuleta ku cipango cakwe. Umulume wakwe alile mu kulwa. Dafidi alala naye kabili panuma aisiba ati akwata ipafu. Dafidi abombomana makosa kabili atuma isiwi kuli Yoabi icilolo cakwe icikulu ica fita ukubika Uliya pantangile pa kulwa pakweba’ti bamwipaye. Ili Uliya afwa, Dafidi aupa Batasyeba.

BaYehoba bamufitilwa ukwakuti Dafidi. Popele batuma umupyungisi wabo Natani ukumubula pa fyakubifya fyakwe. Wamubona Natani uku alukulabila kuli Dafidi. Dafidi asaasa ukwakuti pa fiacita, namulifyefyo baYehoba tabamwipeye. Pano baYehoba balabila ati: ‘Pakuti wacite’fi fintu ifibipile, ukakwata amakatasyo aengi mu ŋanda yobe.’ Kabili wekukatasiwa Dafidi akwata!

Ica kutanga, umwana wakwe Batasyeba afwa. Eli umubele wakwe Dafidi Aminoni ateyanya ukuba enka na Tama inkasi yakwe ne kumupatikisya ukulala naye. Umwana wakwe Dafidi Abisalomi akalipa makosa icakweba’ti aipaya Aminoni. Mukukonkapo, Abisalomi akwata abantu abengi abakumofwa, kabili umwine alibika pa bufumu. Mukupelako, Dafidi acimfya mu kulwisya Abisalomi, uwaipaiwa. Inya, Dafidi ali ne makatasyo.

Pakati ka fyonse’fi, Batasyeba afyala umwana umwalalume uwailicilwe ati Solomoni. Ili Dafidi acekula ne kulwala, Adonija umwana wakwe aesya ukulibika pa bufumu. Pali ceco Dafidi abula umupapatilisi uwe sina lya Sadoko ukwitulwila amafuta pa mutwi wakwe Solomoni ukulangisya ati Solomoni eukaba imfumu. Tapakokwelepo Dafidi alifwile ne myaka 70. Alitekele pa myaka 40, pano Solomoni e mfumu ya Isilaeli.

2 Samweli 11:1-27; 12:1-18; 1 Imfumu 1:1-48.