JERUSALEM-a Davidan rorel a tan hnuah, a sipai rual chu Jehovan an hmelmate chunga hnehna tam tak a pe a. Jehovan Israel-mite hnenah Kanaan ram pek a tiam tawh a. Tunah Jehova tanpuinain, an hnena a tiam tawh ram zawng zawng chu a tawpah an ta a ni ta a.

Davida chu lal tha a ni. Jehova a hmangaih a. Tichuan Jerusalem a lak hnua a thiltih hmasa berte zinga pakhat chu chuta Jehova thuthlung bawm rawn lak chu a ni. A dahna turin biak in sak a duh a.

Davida a lo upatin, thil tha lo tak a tipalh a. Davida chuan mi dang ta thil engemaw lak chu a dik lo a ni tih a hria a. Mahse tlai khat chu, a lal in inchunga a awm laiin, a han en a, hmeichhe hmeltha deuh a hmu a. A hming chu Bath-sebi a ni a, a pasal chu sipaite zinga pakhat, a hming Uria a ni.

Davida chuan Bath-sebi chu a duh khawp mai a, a lal inah a hruaitir a. A pasal ral dovin a kal bo va. Davida chuan a mutpui a, a hnuah nau a nei dawn tih a hria a. Davida chuan a lungkham em em a, a sipai rual hotu Joaba hnenah Uria chu indona hmatawngah a thihna ngei tura dah turin thu a chah a. Uria a thihin Davidan Bath-sebi chu nupuiah a nei a.

Jehova chu Davida chungah a thinur em em a. A sualna chungchang hrilh turin a chhiahhlawh Nathana a tir a. Saw Davida hnena Nathanan a sawi lai saw i hmu thei. Davida chuan a thiltih chu pawi a ti em em a, chuvangin Jehovan amah a tithi lo va. Mahse Jehova chuan: ‘Heng thil tha lote hi i tih avangin, i inah buaina tam tak i nei ang,’ a ti a. Davida chuan buaina a ngah reng mai!

A hmasain, Bath-sebi fapa a thi a. A hnuah Davida fa tir Amnonan a farnu Tamari a mutpui lui a. Davida fapa Absaloman chu chu a thinrimpui khawp a, Amnona a tihlum a. A hnuah, Absaloma chuan mipui tam tak a tilawm a, lalberah a insiam a tum a. Chu veleh Davida chuan puithiam, a hming Zadoka chu Solomona lalber a ni ang tih tilang turin Solomona luah hriak a thihtir a. A hnu rei loteah Davida chu kum 70 niin a thi ta a. Kum 40 chhung a lal a, mahse tunah chuan Solomona chu Israel lalber a ni ta a.