SHO David a tameke okupangela muJerusalem, Jehova ota gandja omasindano ogendji ketanga lye lyaakwiita li sinde aatondi yawo. Jehova okwa li u uvaneke okugandja oshilongo shaKanaan kAaisrael. Nongashingeyi kekwatho lyaJehova, oshitopolwa ashihe shoka sha li she yu uvanekelwa lwahugunina otashi ningi shawo.

David oye omupangeli omwaanawa. Ye oku hole Jehova. Ano shimwe shomiinima mbyoka ye a ningi tango konima sho ye a yugu ko Jerusalem, osho okufala oshiketha shehangano shaJehova hoka. Nokwa hala a tunge otempeli moka tashi vulu okupungulwa.

Sho David a koko, ye ota ningi epuko enene. David oku shi shi kutya osha puka okukutha sha shoka shagumwe i ili. Ihe ongulohi yimwe, omanga ye e li montala yuuwa we, ye ota tala pevi nota mono omukiintu omwaanawa noonkondo. Edhina lye oBatseba, nomulumentu gwe oye gumwe gwomaakwiita ye gwedhina Uria.

David okwa hala Batseba noonkondo opo ye e mu etelwe kuuwa we. Omulumentu gwe oku li kelondo. Ano David ota lala naye nokonima ota mono kutya ye oku li metegelelo. David oti ipula nayi nota lombwele elenga lyaakwiita ye a tule Uria komeho golugodhi mpono ye ta ka dhipagwa. Sho Uria a si, David ota hokana po Batseba.

Jehova okwa geyela David noonkondo. Ano ota tumu omupiya gwe Natan oku ke mu hokololela omayono ge. Ngoye oto vulu okumona nkene Natan ta popi mpaka naDavid. David oku uvite nayi noonkondo kwaashono a ningi, nomolwashoka Jehova ite mu dhipaga. Ihe Jehova ota ti: ‘Molwashoka ngoye owa ningi iinima mbika iiwinayi, ngoye oto ka mona uudhigu owindji megumbo lyoye.’ Alikana uudhigu ou thike peni David ta kala e na!

Tango omwanamati gwaBatseba ota si. Opo nduno omwanamati omutango Amnon ota kala oye awike nomumwayinakadhona Tamar, note mu thiminike oku mu hola. Omwanamati gwaDavid Absalom okwa geya ngaaka kwaashino kutya ye a dhipage Amnon. Konima Absalom ota ningitha oyendji yomoshigwana ye mu hokwe noti iningi ye mwene omukwaniilwa. Lwahugunina David ota sindi iita yawo naAbsalom, ngoka ta dhipagwa. Eeno, David oku na uudhigu owindji.

Pokati mpono Batseba ota mono okamati kedhina Salomo. Sho David a kulupa note ehama, omwanamati Adonia ota kambadhala okwiininga ye mwene omukwaniiilwa. Opo tuu mpoka David ota gwayekitha omusaaseri Sadok omugwayo momutse gwaSalomo okuulika kutya Salomo ota ka kala omukwaniilwa. Konima yokathimbo David okwa si muukokele woomvula 70. Ye okwa pangele uule woomvula 40, ihe ngashingeyi Salomo oye omu-kwaniilwa gwaIsrael.