Ekitebyo 62

Emirabanamu omu Nju ya Daudi

BWANYIMA Daudi ku yaatandikire kutegyeka omuri Yerusaalemu, Yehova yaaheereza eihe rye obusinguzi aha bazigu baabo. Yehova akaba yaaraganiise kuheereza Abaisraeli ensi ya Kanaani. Mbwenu hati, baine obuhwezi bwa Yehova, ensi yoona ei baaraganisiibwe aha muheru eba eyaabo.

Daudi n’omutegyeki murungi. Naakunda Yehova. N’ahabw’ekyo ekintu ky’okubanza eki yaakozire bwanyima y’okukwata Yerusaalemu n’okureeta okwo eshanduuko y’endagaano. Kandi naayenda kwombeka hekalu omu araagite.

Daudi ku yaakuzire, yaakora enshobe mpango munonga. Daudi naamanya ngu tikihikire okutwara ekintu ky’omuntu ondiijo. Kwonka rimwe omu mwabazyo, ku yaabaire naagyendagyenda aha mutwe gw’enju y’omugabe, yaanaga amaisho ahansi kandi yaareeba omukazi murungi. Eiziina rye ni Batisheba, kandi iba n’omwe aha baserikare be orikwetwa Uriya.

Daudi naayenda Batisheba munonga kandi ashaba ngu bamumureetere omu kikaari kye. Iba tariho agiire kurwana. Atyo, Daudi abyama nawe kandi bwanyima Batisheba ayeshanga ngu naaza kuzaara omwana. Daudi atiina munonga kandi atuma ahari Yoabu omukuru w’eihe okwebebembeza Uriya omu rutaro ahu araabaase kwitirwa. Uriya ku afa, Daudi ashwera Batisheba.

Yehova akwatirwa Daudi ekiniga kingi. N’ahabw’ekyo ayohereza omuheereza we Nasani okumugambira eby’ekibi kye. Noobaasa kureeba Nasani aho arikugamba na Daudi. Daudi ashaasha munonga ahabw’eki akozire, kandi ahabw’ekyo, Yehova tamwita. Kwonka Yehova agira ati: ‘Ahabw’okuba okozire ebintu bibi ebi, noija kugira oburemeezi bwingi omu nju yaawe.’ Mbwenu Daudi ka yaagizire oburemeezi!

Eky’okubanza, omwana wa Batisheba ow’omwojo afa. Bwanyima mutabani wa Daudi ow’omujigaijo Amunooni akwata munyaanya Tamari ari wenka amuhamba. Mutabani wa Daudi Abusolomu aitwa ekiniga kingi ahabw’eki kandi aita Amunooni. Bwanyima, Abusolomu akundwa abantu baingi, kandi ayekuza ahinduka omugabe. Aha muheru, Daudi asingura orutaro rwe ahari Abusolomu, kandi Abusolomu aitwa. Eego, Daudi aine oburemeezi bwingi.

Omuri ebi byona, Batisheba azaara omwana orikwetwa Sulemaani. Daudi ku akura kandi yaarwara, omutabani omukuru Adoniya agyezaho kwehindura omugabe. Aho Daudi agambira omunyamurwa orikwetwa Zadoki okushuka amajuta aha mutwe gwa Sulemaani okworeka ngu Sulemaani naija kuba omugabe. Bwanyima y’omwanya mukye Daudi afa aine emyaka 70 y’obukuru. Akategyekyera emyaka 40, kwonka hati Sulemaani niwe mugabe wa Israeli.

2 Samueli 11:1-27; 12:1-18; 1 Abagabe 1:1-48.