CHIʼ David xok che ubʼanik qʼatbʼaltzij pa Jerusalén, Jehová xuya chike ri rajchʼoj xkechʼak kʼi täq chʼoj. Ri Ajawaxel Jehová ubʼim chik chike ri täq israelitas che kuya ri ulew Canaán pa kiqʼabʼ. Kimik rukʼ ri utoqʼobʼ Jehová, ronojel ri ulew xubʼan kech.

David sibʼalaj kraj ri Jehová, rumal laʼ xubʼan jun utzalaj ajawinel. Rumal laʼ, ri nabʼe xubʼano chiʼ uchʼakom chi ri Jerusalén, xukʼam bʼi ri koxon rech pacto chilaʼ. Xuqujeʼ kraj kubʼan jun loqʼalaj ja rech kuya chupam.

Qʼaxnäq chi kebʼ oxibʼ junabʼ, David xubʼan jun nimalaj mak. David retaʼm che utz täj che kkʼam jun jasach, o kos, rech jun winaq chik. Tekʼuriʼ che jun aqʼabʼ, chiʼ kʼo puwiʼ ri rachoch, xril lo ikim che kʼo jun jeʼlikalaj, o tzʼoʼylaj, ixoq. Bat-seba ubʼiʼ, ri rachajil ubʼiʼ Urías, ajchʼoj rech David.

David sibʼalaj xurayij, o xurij, ri Bat-seba, rumal laʼ xubʼij che kkʼam lo pa rachoch. Ri rachajil Bat-seba bʼenäq naj pa chʼoj. Tekʼuriʼ, David xqaj pa mak rukʼ Bat-seba, tekʼuriʼ xuto che kkʼejeʼ jun ralkʼwal rukʼ. David sibʼalaj xuxibʼij ribʼ, rumal laʼ xubʼij che ri ajkʼamal bʼe chike ri ajchʼoj ubʼiʼ Joab che kuya ri Urías chuwäch ri chʼoj rech kkamik. Chiʼ xkam Urías, David xkʼuleʼ rukʼ Bat-seba.

Jehová sibʼalaj xpe royowal, o riwal, che David. Rumal laʼ xutaq bʼik ri ajpatanel Natán rech kubʼij che ri David ri täq umak xubʼano. Chawilampeʼ pa ri wachbʼäl che ri Natán kʼo rukʼ David. David sibʼalaj kʼäx xunaʼ rumal ri umak xubʼano, Jehová xukamsaj täj, tekʼuriʼ xubʼij wariʼ che: ‹Rumal che abʼanom kʼi täq amak, kpe na sibʼalaj kʼi täq kʼäx pa awachoch›. ¿Su täq kʼaxkʼolil xpe rukʼ David?

Nabʼe, xkam ri ral Bat-seba. Tekʼuriʼ ri nabʼe ukʼojol David, ubʼiʼ Amnón, xok rukʼ choqʼabʼ rukʼ ri ranabʼ ubʼiʼ Tamar. Ri jun chik ukʼojol David ubʼiʼ Absalón sibʼalaj xpe royowal, o riwal, rumal laʼ xukamsaj Amnón. Tekʼuriʼ ri winaq utz xkil ri Absalón, rumal laʼ xkaj xkebʼan ajawinel che. Kʼisbʼal re David xuchʼak ri chʼoj rukʼ Absalón xuqujeʼ xkam ri Absalón. David xqʼax pa kʼi täq kʼäx.

Chiʼ xbʼan ronojel wariʼ, Bat-seba xkʼejeʼ jun ral ubʼiʼ Salomón Chiʼ David kʼo chi yabʼil che xuqujeʼ riʼj winaq chik, ri ukʼojol ubʼiʼ Adonías xraj xubʼan ajawinel. David xubʼij che jun ajkojol tabʼal toqʼob ubʼiʼ Sadoc che kuya aceite pa ujolom ri Salomón rech kubʼan ajawinel. Tekʼuriʼ xkam ri David chiʼ kʼo 70 ujunabʼ, xubʼan ajawinel 40 junabʼ. Kimik ri ajawinel are Salomón.