KUANDU David komesa tiha ninia ukun iha Jeruzalein, Jeová halo David nia tropa manán sira-nia inimigu hotu. Jeová promete tiha atu fó rai Kanaan ba ema Izraél. Agora, ho Jeová nia ajuda, rai tomak sai sira-nian.

David mak ukun-naʼin diʼak. Nia hadomi Jeová. Tan neʼe, depois nia manán Jeruzalein, nia arranja kedas atu lori arka aliansa nian toʼo neʼebá. Nia mós hakarak harii templu hodi tau arka aliansa iha laran.

Kuandu David idade liu, nia halo sala boot. David hatene katak sala atu foti ema seluk nia sasán. Maibé kalan ida, kuandu David halimar iha ninia uma-kakuluk, nia haree feto ida neʼebé bonita tebes. Nia naran Batseba, no ninia laʼen mak David nia soldadu ida naran Urias.

David hakarak tebes Batseba, no haruka Batseba atu mai ninia uma. Batseba nia laʼen tuir funu iha fatin seluk. Entaun, David halo relasaun ho Batseba, no lakleur Batseba hatene katak nia isin-rua. David hanoin barak no haruka ninia xefe-tropa Joab atu haruka Urias funu iha tropa seluk nia oin hodi halo Urias mate. Kuandu Urias mate, David kaben ho Batseba.

Jeová hirus tebes ho David. Tan neʼe, nia haruka ninia atan Natan atu koʼalia kona-ba sala sira-neʼe ba David. Ó bele haree Natan koʼalia daudauk ba David. David triste tebes hodi hakribi nia sala, no tan neʼe Jeová la oho nia. Maibé Jeová hatete: ‘Tanba ó halo sala sira-neʼe, ó sei hetan susar barak iha ó-nia umakain.’ No David hetan duni susar barak!

Primeiru, Batseba nia oan mate. Tuirmai, David nia oan-mane boot Amnon, kuandu mesak ho ninia alin-feto Tamar, obriga alin neʼe atu halo relasaun ho nia. David nia oan-mane Absalão hirus tebes kona-ba neʼe toʼo nia oho Amnon. Tinan balu tuirmai, Absalão halo ema barak gosta nia, no halo ninia an sai liurai. Ikusmai, David manán funu hasoru Absalão, no Absalão mate. Sin, David hetan susar barak.

Kuandu buat hotu neʼe akontese, Batseba hahoris oan-mane ida naran Salomão. Kuandu David katuas no moras, ninia oan Adonias koko atu sai liurai. Tan neʼe, David haruka amlulik naran Zadoc atu fui mina ba Salomão nia ulun hodi hatudu katak Salomão sei sai liurai. Lakleur, kuandu David tinan 70, nia mate. Nia ukun ba tinan 40, maibé agora Salomão mak Izraél nia liurai.