DAVIDI wati wayamba kuwusa mu Yerusalemu, Yehova wawovyanga gulu laki lankhondu kupunda arwani ŵawu. Yehova wangulayizga Ayisraele kuti waŵapaskengi charu cha Kanani. Sonu pakumaliya paki Yehova wanguŵawovya ndipu charu cho wanguŵalayizga chinguja nadi chawu.

Davidi wenga fumu yamampha. Iyu wayanjanga Yehova. Sonu wati walonda Yerusalemu, chinthu chakwamba cho wanguchita chenga kuto bokosi la phanganu laku Yehova kuluta nalu ku Yerusalemu. Ndipu wakhumbanga kuzenga nyumba yakusopiyamu kuti wakaŵikemu bokosi la phanganu.

Davidi wati wakuwa wanguchita chinthu chiheni ukongwa. Iyu waziŵanga kuti nkhunanga kuto chinthu chamweni. Kweni zuŵa linyaki mazulu, iyu we pachanya pa nyumba yaki yachifumu, wanguwona munthukazi wakutowa ukongwa. Zina laki lenga Betesheba ndipu murumu waki wenga Uriya yumoza wa asilikali aku Davidi.

Davidi wangumukhumbira ukongwa Betesheba ndipu wangumudaniska kuti wazi kunyumba yaki yachifumu. Panyengu iyi murumu waki wenga ku nkhondu. Betesheba wati waza Davidi wangugona nayu ndipu pavuli paki wenga ndi nthumbu. Davidi wangufipa mtima ukongwa ndipu wangutumiza uthenga kwaku Yoabu, mula wa asilikali ŵaki, kuti waŵiki Uriya panthazi pa nkhondu kuti wabayiki. Ndipu Uriya wati wafwa, Davidi wangutorana ndi Betesheba.

Yehova wangumukwiyiya ukongwa Davidi. Ndipu wangutuma muteŵeti waki Natani kuti wakamukambiyi vo wananga. Kumbi wamuwona Natani yo walongolo ndi Davidi? Davidi wanguchita chitima ukongwa chifukwa cha vo wanguchita ndipu Yehova wangumubaya cha. Yehova wangumukambiya kuti: ‘Chifukwa chakuti wachita vinthu viheni, uŵengi ndi masuzgu nganandi m’nyumba yaku.’ Sonu Davidi wangukumana nadi ndi masuzgu nganandi.

Chakwamba, mwana munthurumi waku Betesheba wangufwa. Pavuli paki, Amunone mwana wakwamba waku Davidi wangukolele mzichi waki Tamara. Mwana waku Davidi, Absalomu, wangukwiya ukongwa ndipu wangubaya Amunone. Pavuli paki, ŵanthu anandi angumuyanja Absalomu ndipu wangujiŵika kuja fumu. Pakumaliya paki Davidi wangumuthereska Absalomu ndipu wangufwa. Masuzgu ngo Davidi wangukumana nangu ngenga nadi nganandi.

Panyengu yo ivi vachitikanga, Betesheba wangubala mwana munthurumi zina laki Solomoni. Davidi wangukota ndipuso watamanga, sonu mwana waki Adoniya wangwesa kujiŵika pa ufumu. Mwaviyo Davidi wangutuma wasembi Zadoki kuti wapunguliyi mafuta pamutu waku Solomoni, kulongo kuti ndiyu wazamuja fumu. Pati pajumpha nyengu yimanavi Davidi wangufwa we ndi vyaka 70. Iyu wanguwusa kwa vyaka 40, pavuli paki Solomoni ndiyu wanguja fumu ya Yisraele.