DAVIDE wakati wayamba kuwusa mu Yerusalemu, Yehova wakawovwira ŵasilikari ŵake kutonda nkhondo zinandi. Yehova wakalayizga kupeleka caru ca Kenani ku Ŵaisrayeli. Na wovwiri wa Yehova, caru cose ico Yehova wakalayizga cikaŵa cawo.

Davide wakaŵa fumu yiwemi. Wakatemwa Yehova. Mwantheura, cimoza mwa vinthu vyakwambilira ivyo wakacita wati wapoka Yerusalemu cikaŵa kunyamura likasa la Yehova na kuluta nalo kwenekura. Wakakhumbanga kuzenga tempele kuti ndimo likasa likhalenge.

Davide wakati wacekura, wakapanga ubudi ukuru comene. Iye wakamanyanga kuti mbuheni kutora cinthu camwene. Kweni mise yinyake, apo wakaŵa pa mtenje wa nyumba yake, wakawona mwanakazi wakutowa comene. Zina lake wakaŵa Batisheba, ndipo mfumu wake wakaŵa Uriya, yumoza wa ŵasilikari ŵake.

Davide wakamudokera comene Batisheba mwakuti wakatuma munthu kukamucema na kwiza nayo ku nyumba yake. Mfumu wake wakaŵa ku nkhondo. Davide wakagona nayo ndipo pamanyuma pake wakawona kuti waŵenge na mwana. Davide wakasuzgika comene mu maghanoghano, ntheura wakaphalira Yoabu kuti waŵike Uriya panthazi ku nkhondo kuti wakomeke. Uriya wakati wafwa, Davide wakatora Batisheba.

Yehova wakakwiya comene na ivyo Davide wakacita. Ntheura wakatuma muteŵeti wake Natani kuti wakamuphalire kwananga kwake. Ungamuwona Natani pa cithuzithuzi apa wakuyowoya na Davide. Davide wakaŵa wacitima comene cifukwa ca ivyo wakacita, ntheura Yehova wakamukoma yayi. Kweni Yehova wakati: ‘Cifukwa ca vinthu viheni ivyo wacita, uŵenge na masuzgo ghanandi mu nyumba yako.’ Mwee, nayo ni suzgo iyo Davide wakaŵa nayo!

Cakwamba, mwana wa Batisheba wakafwa. Pamanyuma pake Amunoni, mwana wakwamba wa Davide, wakacicizga Tamara, mudumbu wake, kuti wagone nayo. Abisalomu, mwana wa Davide, wakakwiya comene na ici mwakuti wakakoma Amunoni. Nyengo yikati yalutapo, Abisalomu wakakopa mitima ya ŵanthu ŵanandi ndipo wakajiŵika kuŵa fumu. Paumaliro, Davide wakatonda nkhondo pa kwimikana na Abisalomu, uyo wakakomeka. Enya, Davide wakaŵa mu masuzgo ghanandi.

Mukati mu vyose ivi, Batisheba wakababa mwana mwanalume zina lake Solomoni. Davide wakati wacekura na kurwara, Adoniya, mwana wake, wakakhumba kujivwarika ufumu. Penepapo Davide wakaphalira Zadoki, musofi, kuti wapungulire mafuta pa mutu wa Solomoni kulongora kuti Solomoni ndiyo wazamuŵa fumu. Pakati pajumpha nyengo yicoko waka Davide wakafwa na vilimika 70. Wakawusa vilimika 40, ndipo pamanyuma pake Solomoni ndiyo wakaŵa fumu ya Israyeli.