KʼALAL lik ajvalilajuk ta Jerusalén li Davide, li Jeovae la skolta ta epal pas letoetik li yajsoltarotak Davide. Li Jeova Diose yaloj onoʼox ta melel ti ta xakʼbe j-israeletik li yosilal Canaane. Tana liʼ ne, koliyal li Jeovae skotol li yosilal Canaane jaʼ xa yuʼunik.

Li Davide jaʼ lekil ajvalil. Skʼanoj Jeova. Jech oxal, li kʼusi baʼyel la spas ti kʼalal oy xaʼox ta skʼob li Jerusalene jaʼ ti la jyichʼ tal li xkaxail smantal Jeovae. Tskʼan tspas jpʼej chʼulna (templo) sventa te ta xakʼ li xkaxail smantal Diose.

Echʼ jabiletik, li Davide la spas tsots smul. Li stuke snaʼoj ti mu xuʼ stsak li kʼusi maʼuk yuʼune. Pe jun mal kʼakʼal, kʼalaluk te oy ta sjol snae, la skʼel yalel vaʼun te la jyil jun kʼupil sba ants. Jaʼ sbi Betsabé (Bat-seba), li smalal li ants taje jaʼ sbi Urías jaʼ yajsoltaro li Davide.

Li Davide tskʼan tajek li Betsabee, jech oxal la jyal mantal ti akʼo yikʼik tal ta snae. Li smalale nom oy ta pas leto. Li Davide la xchiʼin ta vayel, ta mas tsʼakal li Betsabee la jyaʼi ti xchiʼuk xa yole. Li Davide xi la jyalbe batel Joab, li bankilal ta yajsoltarotake: Jaʼ xa vakʼ ta jbabe li Urías ti bu toj tsots letoe sventa te chcham, xut. Kʼalaluk cham li Uriase, li Davide la jyikʼ li Betsabee.

Li Jeovae ilin tajek ta stojolal li Davide. La stak batel Natán sventa chba xchiʼin ta loʼil ta skoj smul li Davide. Mi xa vil ti te oy li Natán xchiʼuk li Davide. Li Davide toj chopol chaʼi sba ta skoj li kʼusi spasoje, jech oxal muʼyuk xmilat yuʼun ti Jeovae. Pe xi la jyale: Ta skoj ti kʼusitik chopol la pase, ep kʼusitik chopol ta xkʼot ta pasel te ta ana. ¡Ti svokol xa noʼox li Davide!

Ta baʼyele, li yol Betsabee cham. Laj ne li sbankilal kerem li Davide, jaʼ li Amnone, la stsak ta persa li yixlele, li Tamare. Ta skoj liʼe ilin tajek li Absalone, li xnichʼon Davide, jaʼ yuʼun la smil li Amnone. Li Absalone la stsob ep sviniktak, vaʼun la spas ti akʼo pasatuk ta ajvalile. Jaʼ kuch yuʼun David li ta pas leto ta skontra li Absalone, vaʼun te cham. Ta melel, li Davide ta xichʼ tajek svokol.

Manchuk mi jech chkʼotanuk ta pasel taje, li Betsabee vokʼ jkot yol jaʼ sbi Salomón. Kʼalal ip xchiʼuk mol xaʼox li Davide, li skerem ti jaʼ sbi Adoniase ch-och xaʼox yaʼi ta ajvalil. Pe li Davide la jyalbe jun pale, Sadoc sbi, ti akʼo smalbe aseite ta sjol Salomón sventa chvinaj ti jaʼ ch-och ta ajvalile. Mu toʼox ta sjaliluk, li Davide cham ti kʼalal yichʼoj 70 jabile. Ajvalilaj 40 jabil. Tana liʼ ne jaʼ xa ajvalil li Salomone.