Tantara 62

Nisy Ra-nanahiran̈a Tan-tran̈on’i Davida

DAVIDA koa fa nanjaka ta Jerosalema, maramilanany nataon’i Jehovah nandresy fo. Jehovah nivolan̈a fa han̈amia Israelita aby io tany Kanana. Jehovah koa fa nan̈ampy irô, nazon-drô amy zay tany io.

Ampanjaka tsara fan̈ahy Davida. Izy tia Jehovah. Koa fa nazony tanànan’i Jerosalema, raha voanalohany nataony, namindra fiaran’ny fanekena in̈y tao. Davida koa ti hiasa tempoly han̈apitrahan̈a fiaran’ny fanekena io.

Davida koa fa nahainatoe, nan̈ano raha tsy mety. Davida mahay fa tsy mety mangala rahan’olo. Andra araiky amy zay, andra tamy zen̈y fa tsôfotro, izy nitsangatsangana tan̈abo etazy, tamy tran̈onany. Izy baka iô nahatazan̈a man̈angy tsara, Batseba an̈arany. Oria an̈aran̈a vadin’i Batseba. Izy an̈isan’ny maramilan’i Davida koa.

Davida tia Batseba mare, ke nampaviany tan-tran̈onany tao izy. Vadiny tamy zen̈y mbala lôso niady. Davida baka tiô nandry taminany, ke tafaran’izin̈y man̈angy io navesatra. Davida niasa loha mare. Izy nan̈iraka olo hivolan̈a tamy Joaba sefon’ny maramilanany fa Oria mila alefa farany aloha, beky maty. Oria koa fa naty, Davida nangala vady Batseba.

Jehovah neloko mare tamy Davida. Izy nan̈iraka Natana mpaminan̈y, hitantara amy Davida adisovan̈a nataony. Hitanao amy sary iô Natana mikoran̈a aminany. Davida baka iô nanen̈iny mare tamy raha nataony, ke Jehovah tsy namono izy. Jehovah fo nivolan̈a taminany: ‘Fôtony anao nahavita raha ratsy jiaby zen̈y, ho feno ra-manahiran̈a an-tran̈onao.’ Zen̈y ankitin̈y raha nahazo Davida!

Voanalohany, zanaka Batseba lelahy naty. Baka iô, Amnona talan̈olon’i Davida, nan̈olan̈a Tamara anabaviny. Absaloma zanaka Davida neloko mare naharen̈y zen̈y, ke nivoneny Amnona. Tsy elan’izin̈y, Absaloma nanjary tian’olo, ke izy tômpony fo nan̈ano izy ampanjaka. Tamy farany, Davida ndreky Absaloma nan̈ano lagera, ke Absaloma naty. Tôjy ra-nanahiran̈a maro ankitin̈y Davida.

Tan̈ivon̈ivon’ny raha jiaby zen̈y, Batseba niteraka lelahy. Solomona an̈arany. Davida koa fa natoe, ke narary, Adonia zanany lelahy nan̈ano izy ampanjaka. Tamy zen̈y Davida nan̈iraka Zadoka mpisôron̈o han̈idiny menaka tamy lohan’i Solomona, ahaizan̈a fa izy hatao ampanjaka. Tsy ela tafaran’izin̈y, naty Davida. Izy tamy zen̈y 70 taon̈o. Izy nanjaka tan̈atin’ny 40 taon̈o, fa iziô, Solomona ampanjakan’Israely.

2 Samoela 11:1-27; 12:1-18; 1 Mpanjaka 1:1-48.