DAUDI paŵagambile kutanda kulamulila mu Yelusalemu, Yehofa ŵakamucisye asilikali ŵakwe kupunda ngondo syakulimbana ni acimmagongo ŵawo. Yehofa ŵasalile Ayisalayeli kuti cacapa cilambo ca Kanani. Sambano kaneko, ni cikamucisyo ca Yehofa cilambo cosope caŵasalile kuti cacapa caliji cawo.

Daudi ali mlongola jwambone. Jwalakwe akusamnonyela Yehofa. Sambano cindu candanda cakutenda pagambile kusumula msinda wa Yelusalemu, cili kujigalila ku Yelusalemu libokosi lya cilangano lya Yehofa. Jwalakwe akusaka kutaŵa Nyumba jakupopelela kuti aŵice libokosilyo.

Daudi pakusile, akutenda cakulemwa cekulungwa. Daudi akusamanyilila kuti kuli kulemwa kujigala cindu camsyene. Nambo lisiku line kwigulo, pali pamsakasa wa nyumba jakwe ja ucimwene, akulola pasi ni akum’wona jwamkongwe jwakusalala mnope ali mkoga. Lina lya jwamkongweju lili Batiseba, ŵamkwakwe ali jumo jwa asilikali ŵa Daudi lina lyakwe Uliya.

Daudi akumsaka kwamnope Batiseba mwati mpaka akum’ŵilanjila m’nyumba jakwe ja ucimwene. Ŵamkwakwe Batiseba ali kungondo. Daudi akugona najo kaneko jwamkongwe jula akukola citumbo. Daudi ali ukumkamula woga mnope ni akumtumicisya utenga mlongola jwa asilikali ŵakwe Yowabu kuti Uliya am’ŵice pamsele wakusogolo wa ŵakuputa ngondo kuti awe. Uliya jula pawile, Daudi akulombela Batiseba.

Yehofa atumbile mnope ni Daudi. Ni akumtuma jwakutumicila jwakwe Natani kuti akamsalile ya kulemwa kwakwe. Ana akum’wona Natani jwakuŵeceta ni Daudijo? Daudi akulitendela canasa ligongo lya yindu yatesile, ni Yehofa ngakum’wulaga. Nambo Yehofa akumsalila kuti: ‘Ligongo lyakuti mtesile yakulemwecekayi, cimcikola yakusawusya yejinji m’nyumba jenu.’ Ni Daudi ŵayiweni yipwetesi!

Candanda, mwanace jwa Batiseba ŵawile. Kaneko mwanace jwandanda kupagwa jwa Daudi, Aminoni akulinganya lipesa lyakuti aŵe ŵaŵili ni mlumbugwe ni akugona najo mwakumkanganicisya. Abisalomu mwanagwe Daudi atumbile mnope ni yeleyi mwati akum’wulaga Aminoni. Kaneko, Abisalomu akwatendekasya ŵandu ŵajinji kumnonyela, ni jwalakwe akuliŵika jika kuŵa mwenye. Pambesi pakwe ŵane akum’wulaga Abisalomu, Daudi akupunda ngondo jakulimbana ni Abisalomu. Yisyene, Daudi akusimana ni yakusawusya yejinji.

Payatendekwaga yeleyi, Batiseba akuŵeleka mwanace jwamlume lina lyakwe Solomoni. Daudi pakalambele, soni pakulwala, mwanace jwakwe jwine Adoniya akulinga kuliŵika kuŵa mwenye. Pandaŵiji Daudi akum’ŵenda jwamkulungwa jwa ŵambopesi Sadoki, kumtaga mawuta Solomoni pamtwe, kulosya kuti Solomonijo caciŵa mwenye. Pali papite kandaŵi panandi Daudi akuwa ali akwete yaka 70. Jwalakwe alamulile kwa yaka 40. SambanoSolomoni ni jwakuŵa mwenye jwa Ayisalayeli.