WAYNITUSKÄN ukhaw Salomonax apnaqirit uttʼayatäna. Jehová Diosar wal munasïna, Davitan iwxaparjamaw kuns luräna. Salomonax Diosar kusisiyänwa, ukatwa mä arumax samkan akham säna: ‘Salomón, kuntï munkta uk mayita’ sasa.

Salomonax akham sänwa: ‘Jehová Diosaja, nayax waynakïsktwa, janiw kunjam apnaqañs yatkti. Yatiñkankañ churita aka mark sum apnaqañataki’ sasa.

Salomonax kuntï maykän ukax Jehová Diosatakix wali askïnwa. Ukatwa akham säna: ‘Yatiñkankañwa mayistaxa, janiw jaya maranak jakañsa, ni qamirkankañsa, jichhax yatiñkankañwa churäma, wali yatiñaniptätawa janiw ukham yatiñani jaqix jichhakam utjkiti. Ukampisa, jan maykista ukampwa churäma, jïsa, qamirkankaña jachʼakankañ churäma’ sasa.

Mä urux pä warmiw Salomonan ukaru mä jan waltʼäwimpi jutapxäna. ‘Aka warmimpi nayampisti mä utanak jakasipxta’ sasaw maynix säna. ‘Nayaw nayraqat ususta, ukat kimsürut jupax ususiraki. Mä arumaw wawapax jiwxatayna. Ukampis nayax ikiskayäta ukhawa wawaj apasitayna, jiwat wawapwa naya jakʼar jaytawayatayna. Alwax waw uñxatasta ukhaxa, jiwatakïxataynawa, ukat sum uñakiptxa janiw wawajäkataynati’ sasa.

Uk istʼasaxa, mayni warmix akham sarakïnwa: ‘¡Janiwa! ¡Jakaski ukaxa wawajäskapuniwa, jiwatäki ukaw jupan wawapaxa!’ sasa. Nayrïr warmix sarakiwa: ‘¡Janiwa! ¡Jiwatäki ukawa wawamaxa, nayan wawajasti jakaski ukawa!’ sasa. Ukhamwa uka mamanakax jiskhisipxäna. ¿Salomonax kamachänsa?

Mä espada mayïna, aptanipxän ukhaxa, akham sänwa: ‘Jakaskir wawar payar kharjapxma, ukat sapaqat maynir chikatkama churapxam’ sasa

‘¡Jani!’ sasaw taykapax jachʼat warartatäna. ‘Janikiy aka wawarux jiwayapxamti. ¡Juparuk wawxa churxapxam!’ sasa. Ukampis mayni warmixa: ‘Jan nayatakïkpansa, ni jupatakïkpansa. ¡Payar kharjapxam!’ sänwa.

Ukat Salomonaxa: ‘¡Jan jiwayapxamti! Nayrïr warmir churxapxma. Jupaw taykapaxa’ sänwa. Salomonax sumpi ak amuyänxa: taykax wal wawapar munasïna, ukatwa jan jiwayañapatakix maynir churxapxakim sänxa. Uka jan waltʼäwi Salomonan askichatap istʼasaxa, ukham yatiñani apnaqirinïsax wal jaqinakax kusisipxäna.

Salomonax apnaqkän ukhaxa, Diosax markapar wal bendicïna, trigompi, cebadampi, uwasampi, higosampi, yaqha manqʼanakampi churäna. Jaqinakax sum isisipxäna, suma utanakan utjasipxäna. Sumanakax taqinitakiw utjäna.