Maana 63nan

Masakɛ hakilitigi Solomani

SOLOMANI tun ye kamalennin ye tuma min na a kɛra masakɛ ye. A tun bɛ Jehova kanu. A fa Dawuda tun ye laadilikan ɲuman min di a ma, a tugura o fana kɔ. A ko tun ka di Jehova ye. Don dɔ sufɛ, Jehova y’a fɔ a ye sugo la ko: ‘Solomani, e b’a fɛ ne ka mun di i ma?’

Solomani ye a jaabi ko: ‘Jehova ne ka Ala, ne ye denmisɛn yɛrɛ de ye, ne t’a dɔn i ka jamakulu bɛ mara cogo min na. O kosɔn, hakilitigiya di ne ma walisa ne ka se k’i ka jamakulu mara cogo tilennen na.’

 Solomani ye min ɲini Jehova fɛ, o diyara Jehova ye kosɛbɛ. A ko: ‘Ikomi i ye hakilitigiya de ɲini ne fɛ, nka i ma si jan walima nafolo ɲini, ne bɛna hakilitigiya di i ma, hakilitigiya min ka bon kosɛbɛ, mɔgɔ si ma hakilitigiya min ɲɔgɔn sɔrɔ fɔlɔ. I ma fɛn minnu ɲini ne fɛ, ne bɛna o fɛnw fana di i ma: nafolo ani tɔgɔba.’

A ma mɛn o kɔfɛ, muso fila nana Solomani ma ni ko gɛlɛn dɔ ye. Muso kelen ko: ‘Ne ni nin muso bɛ so kelen kɔnɔ. Ne jiginna denkɛ la. Don wɛrɛ la o kɔfɛ, ale fana jiginna denkɛ la. Nka, don dɔ sufɛ, a den sara. Ne tun bɛ sunɔgɔra tuma min na, a ye a den salen ta, ka a da ne kɛrɛfɛ, ka tila ka ne den ta. Ne wulila tuma min na, ne ye den salen lajɛ, ne y’a ye ko ne den tɛ.’

Muso tɔ kelen fana ko: ‘Ayi. Den ɲɛnama ye ne de ta ye, den salen ye ale de ta ye.’ Muso min fɔlɔla ka kuma, o y’a jaabi ko: ‘Ayi, den salen ye e de ta ye, ɲɛnama ye ne ta ye.’ Muso fila bɛɛ tun bɛ ka ɲɔgɔn sɔsɔ o cogo la. Solomani bɛna mun kɛ sisan sa?

A y’a fɔ a ka mɔgɔw ye ko u ka na ni npan ye. U nana ni npan ye tuma min na, Solomani ko: ‘Aw ye den ɲɛnama tila fila ye, ka tilancɛ di muso kelen ma, ka tilancɛ di muso tɔ kelen fana ma.’

Muso min den don tigitigi, o kulela k’a fɔ ko: ‘Ayi, sabali! I kana den faga. I ka den di ale ma.’ Nka, muso tɔ kelen ko: ‘I kana a di an si ma. A tila fila ye.’

O la sa, Solomani y’a fɔ ko: ‘Den kana faga. Den di muso fɔlɔ ma. Ale de ye den ba yɛrɛ-yɛrɛ ye.’ Solomani sera ka o dɔn, bawo muso min den don tigitigi, a tun b’a den fɛ kosɛbɛ, fo a sɔnna ka o di muso wɛrɛ ma, walisa den kana faga. Solomani ye o ko kiri tigɛ cogo min na, mɔgɔw ye o mɛn tuma min na, u nisɔndiyara kosɛbɛ ko o masakɛ hakilitigi sugu bɛ u kunna.

Solomani ka mara kɔnɔna na, Ala ye dugawu lase jamana kɔnɔmɔgɔw ma. Ala y’a kɛ dugukolo ye alikama, orje, rezɛn ni torow, ani dumunifɛn caman di. Mɔgɔw tun bɛ fini ɲumanw don. U tun sigilen bɛ so ɲumanw kɔnɔ. Fɛn ɲuman si tun tɛ mɔgɔ si jɛ.

1 Masakɛw 3:​3-28; 4:​29-34.