SALOMÓN reyga megnonigua, anba sabbingwa. Salomón, Jehová sabe, geb e bab David, ega binsaed dagsadbali nanadii gusa. Jehová anba yeer Salomón dagmoga, agala ibagwengi muddiggidba gabgin ega soge: ‘Salomón, ¿ibu beg an ugged be an abege?’

Salomón abin ega soge: ‘Babdummad Jehová, anba andi sabbingwa soggu an wissuli igi an negseer gebe. Degsoggu, binsaed nigga dae be an imagge, nabir nued an be neggwebur idugega’.

Jehová yeeriddoge Salomón ese we ibmar egidsadba. Agala Jehová soge: ‘Ar be binsaed nigga daed egidsa soggua, undar dula gudigued be egidsasuli, be mani ibedga gued egidsasurbar soggu, dule bamalad Nabbaneggi gudigusmaladba, nue ibmar wisi guedga an be imaggodo. Auggine, be ibmar egidsasulidi an bega ugbaloe, an be imagbaloe be mani ibedga guedi geb be nug odummolegedi an imagbaloe’.

Sorba isse saaledgi, warbo omegan Salomónse danimala, igar soggwen yeer gangu aburnaid nudaggega. Ome wargwen soge: ‘We ome anbo, na neg mesa anmar gudii. An goe niggusa, geb ibbogi we ome goe niggusmoga. Degine, ibagwengi muddiggidba we ome goe burgwisa. Geb an gabmagua an nagab e goe burgwaled mesisa geb an goe dulad ani sesa. An addaggargua, an daggali goe burgwaled an nagab mai, auggine an yog magdaggale, an goe suli’.

Deyob soge iddoargua, ome baid soggali: ‘¡Suli! ¡Goe duladi an gadi, geb burgwaledi we ome gadi!’ Degine ome gebe sunmasadi sogde bali: ‘¡Suli! ¡Burgwaled be gadi, geb dulad an gadi!’ Weyob omegan na abinabin imagnai guarmala. ¿Igi Salomón saoe?

Emisgi Salomón soggali ega espada sedamarye, geb ega senonimargua, soge: ‘Goe duladi negabar be sigmalo, geb naglignaglig we omeganga be ugmalo’.

‘¡Suli!’. E nan sunnadi gollali. ‘Mer goe oburgwemala. ¡Bur we omega be ugmarsunna!’. Auggi ome baiddina soge: ‘Mer anmar wargwenga ugmalo; bur negabar sigmala’.

Salomón emisgi soge: ‘¡Mer goe oburgwemalo! Ome gebe sunmasadga bur be ugge. We ome bur goe e nan sunnadid’. Salomón we wisi, ar e nan sunnad na belabela goe sab soggua, mer e goe oburgwemalaga bur baid omega uggedgi binsasad. Dulemar wisguargua weyob Salomón igar nudasye, yeeriddoarmala rey nue ibmar wisi dagleargua.

Salomón rey gala negdagmai gusgua, geb Babdummad neggwebur bendagmai gusa. Nabba yeer ibmar sanmagge imasa, ibmar orosgimaladi, uvamar geb higomar, geb bamalad ibmar gullemalad yeer sanmasbali. E dulemar mor nuegan yoi gudigusmala geb neg nuegan gine gudigusmar bali. Bela ibmar nuegan obinegwadgi emarga niggusa.