SE ITABAGONE ga o Solomoni sa tui. E dau lomani Jiova qai muria tale ga na ivakasala vinaka i tamana, o Tevita. E dau taleitaki Solomoni o Jiova. Dua gona na bogi e tarogi koya o Jiova ena tadra: ‘Na cava o vinakata meu solia vei iko, Solomoni?’

E sauma o Solomoni: ‘I Jiova na noqu Kalou, au sa rui gone, au sega tale tu ga ni kila na veiliutaki. Ni solia vei au na vuku meu liutaki ira vakavinaka kina na nomuni tamata.’

A marautaka o Jiova na kerekere i Solomoni. Sa qai kaya: ‘Ni o sa kerea ga na vuku, sega ni bula balavu se iyau, sa na uasivi sara na vuku au na solia vei iko. Au na solia tale ga vei iko na iyau kei na lagilagi.’

Dede vakalailai rau mai raici Solomoni e rua na yalewa ena vuku ni dua na leqa levu. E kaya e dua: ‘Keirau tiko vata kei na yalewa oqo. Niu sa vakasucu oti a qai vakasucu tale ga o koya ni oti e rua na siga. Mani mate na luvena ena dua na bogi. Niu se moce tiko a qai kauta lo mai na luvena me veisautaka kei na luvequ. Ia niu yadra mai au kila sara ga ni sega ni luvequ na gone e davo tu e yasaqu.’

Sa qai kaya mai na ikarua ni yalewa: ‘Sega! Sa mate tu na luvena, ia na luvequ ga e bula tiko!’ Mani sauma na imatai ni yalewa: ‘Sega! Na luvemu o koya e mate, na luvequ e se bula tiko.’ Rau veileti tiko ga, na cava beka ena cakava kina o Solomoni?

Sa qai talai e dua me kauta mai na iseleiwau, qai kaya: ‘Mo musuka rua na gone, me rau yadua na tikina.’

E tagicaka yani na tinanigone dina: ‘Kua! Yalovinaka kua ni vakamatea. Solia ga vua!’ E kaya tale na ikarua ni yalewa: ‘Musuka ga, me kua ni dua vei keirau e nona.’

Oti, sa qai kaya o Solomoni: ‘Kua ni vakamatea na gone! Solia ga vua na imatai ni yalewa. O koya e tinana dina.’ E kila o Solomoni ni o koya ga e tinana dina na gone ena bolea me soli na gone, ia me kua ga ni vakamatei. Nira rogoca na tamata na sala e walia kina na leqa oya o Solomoni, era qoroya nona vuku.

Ena gauna e veiliutaki tiko kina o Solomoni e vakalougatataki ira na tamata na Kalou ni vakatubura vakalevu na kedra vuata kei na kakana tale e so. Era vakaisulu totoka qai vakavale vinaka. E sega ni lailai na veika e tu vei ira.