SOLOMONA be mauri lagani 20 ia do abia lasi neganai king ai ia lao. Iehova ia lalokau henia, bona ena tamana Davida ese ia henia sisiba namona ia badinaia. Iehova be Solomona dekenai ia moale, unai dainai hanuaboi ta nihi ta lalonai ia hamaoroa: ‘Solomona e, oi ura dahaka gau oi dekenai lau henia?’

Solomona ia haere: ‘Iehova egu Dirava e, lau be matamata momokani bona lohia dalana lau diba lasi. Unai dainai lau dekenai aonega oi henia emu taunimanima be dala maoronai lau lohiaia totona.’

Iehova be Solomona ena noinoi dekenai ia moale. Unai dainai Ia gwau: ‘Aonega totona oi noinoi, to mauri daudau eiava kohu momo totona lasi. Unai dainai, oi do lau henia aonega be guna taudia bona gabeai taudia ibounai edia aonega do ia hanaia. To oi noia lasi gaudia danu oi dekenai do lau henia, kohu momo bona hairai.’

Nega sisina murinai, hahine rua be hekwakwanai ta danu Solomona dekenai idia mai. Hahine ta ia gwau: ‘Inai hahine bona lau be ruma tamona dekenai ai noho. Lau ese mero ta lau havaraia, bona dina rua murinai ia danu ese mero ta ia havaraia. Bena hanuaboi ta, iena natuna ia mase. To lau mahuta noho neganai, ena mase natuna be lau badinai ia atoa bona lauegu ia abia. Vadaeni, lau noga bona mase natuna lau itaia neganai, lau diba ia be lauegu lasi.’

Bena hahine iharuana ia gwau: ‘Lasi! Mauri natuna be lauegu, bona ia mase merona be iena!’ Hahine ginigunana ia haere: ‘Lasi! Ia mase merona be oiemu, to mauri merona be lauegu!’ Unai bamona idia hepapahuahu. Solomona be dahaka do ia karaia?

Tuari kaia ta ia noia bona idia mailaia neganai, ia gwau: ‘Kahana rua dekenai mero umui utua, bona kahana ta hahine ta do oi henia bona ma kahana ta hahine ta dekenai henia.’

Sinana korikorina ia boiboi mai taitai ida, ia gwau, ‘Lasi! Mani mero oi alaia lasi. Ia dekenai oi henia!’ To hahine iharuana ia gwau: ‘Ai ta dekenai oi henia lasi; namona be oi utua parara.’

Vadaeni, Solomona ia gwau: ‘Natuna oi alaia lasi! Hahine ginigunana dekenai oi henia. Ia be sinana korikorina.’ Solomona be unai ia diba badina sinana korikorina ese ena natuna ia lalokau henia bada, unai dainai hahine ma ta dekenai ia henia, unai amo idia hamasea lasi. Taunimanima be Solomona ese unai hekwakwanai ia hamaoromaoroa dalana idia kamonai neganai, idia moale badina edia king be mai ena aonega.

Solomona ena lohia negana lalonai, Dirava ese Israela taudia ia hanamoa dainai, edia tano amo uiti, bali, vain huahua, fig bona aniani ma haida be momo herea idia tubu. Dabua namodia idia karaia bona ruma namodia dekenai idia noho. Iboudiai edia gau namodia be hegeregere momokani.