Ombara onongo Salomo
EHUNGI 63
Ombara onongo Salomo
SALOMO wa ri omutanda indu tja rira ombara. Eye wa suverere Jehova, nu aa kongorere omaronga omawa ihe David nge mu pere. Jehova wa ri nonyuṋe na Salomo, nu mena ranao ouṱuku umwe we mu raera moruroto: ‘Salomo, ove mo vanga kutja mbi ku pe tjike?’
Salomo we mu zira na tja: ‘Jehova Mukuru wandje, ami owami omuṱiṱi tjinene nu hi nakutjiwa okuhonapara. Okutja ndji pa ounongo wokuhonaparera otjiwaṋa tjoye momuano omusemba.’
Jehova wa ri nonyuṋe na imbi Salomo mbya ningira. Okutja Eye wa tja: ‘Mena rokutja ove wa ningira ounongo nu ko ningirire omuinyo omure poo outumbe, ami me ku pe ounongo ouingi okukapita kangamwa omundu ngwa hupire kombanda yehi. Nungwari ami wina me ku pe imbi mbi u ha ningirire, outumbe nohiviriko.’
Oruveze orusupi kombunda yanao ovakazendu vevari ve ya ku Salomo nouzeu ounene. Umwe wawo wa tja: ‘Ami nomukazendu ngwi twa tura mondjuwo imwe. Ami mba panduka okanatje okazandu, nu kombunda yomayuva yevari eye wina wa panduka okanatje okazandu. Okuzambo ouṱuku umwe okanatje ke ka ṱa. Nungwari ngunda a mba rara, eye wa twa okanatje ke ku ka koka meṋe yandje nu a toora okanatje kandje. Ami tji mba penduka ne tara kokanatje ku ka koka, ami mba muna kutja ka kandje.’
Okutja omukazendu ingwi owarwe wa tja: ‘Kako! Okanatje ku ke nomuinyo okandje, nu inga ku ka koka oke!’ Omukazendu ingo omutenga wa zira a tja: ‘Kako! Okanatje inga ku ka koka okoye, nu inga ku ke nomuinyo okandje!’ Momuano mbwi ovakazendu otji va patasana. Salomo wa tjita vi ohunga na ihi?
Eye wa raa engaruvyo, nu tji ra etwa, eye wa tja: ‘Konda okanatje inga ku ke nomuinyo motumbembera tuvari, nu auhe mu pa orumbembera rumwe.’
Nu ingwi ngu ri ina yokanatje nga katjotjiri wa ura na tja: ‘Kako! Arikana o zepa okanatje. Ke yandja ku ye!’ Nungwari omukazendu ingwi owarwe wa tja: ‘O yandja ku umwe wetu, ke konda motumbembera.’
Korusenina Salomo wa hungira na tja: ‘O zepa okanatje! Ke yandja komukazendu ingwi omutenga. Eye ongu ri ina wa katjotjiri.’ Salomo aa tjiwa otjiṋa hi mena rokutja ina yokanatje nga omuinimuini we ke suverere tjinene ngandu ndi tja ri nombango yokukeyandja komukazendu ingo warwe kokutja ake ha zepewa. Indu otjiwaṋa tji tja zuva omuano Salomo mbwa kutura ouzeu mbwi, otjo tja ri nonyuṋe okukara nombara onongo otja indjo.
Moruveze rouhonapare waSalomo, Mukuru wa sera otjiwaṋa tje ondaya nu wa tjita kutja ehi ri hape ovikokotwa ovingi nomandjembere nomakuyu novikurya vyarwe. Ovandu aave zara ozombanda ozombwa nu va turire mozondjuwo ozombwa. Avehe va ri noviṋa oviwa ovingi.
