OKENỌ Solomọn ọjọ ovie yọ ọ rọ ọmaha. O you Jihova, o te je lele emamọ uthubro nọ Devidi ọsẹ riẹ ọkẹ riẹ. Eva Solomọn etẹ were Jihova, fikiere ọ tẹ jọ aso jọ tẹme kẹe evaọ ewezẹ nnọ: ‘Solomọn, eme whọ gwọlọ nọ mẹ rehọ k’owhẹ?’

Solomọn o te yo nnọ: ‘Jihova Ọghẹnẹ mẹ, mẹ maha hrọ mẹ gbẹ jẹ riẹ epanọ a re su hu. Fikiere k’omẹ areghẹ nọ mẹrẹ rehọ su ahwo ra evaọ uvi edhere.’

Eva etẹ were Jihova kpahe onọ Solomọn ọyare. Fikiere ọ tẹ ta nọ: ‘Fiki epanọ whọ yare areghẹ ogbẹrọnọ uzuazọ uthethe hayo efe he na, mẹ rẹ te kẹ owhẹ areghẹ vi kohwo kohwo nọ ọria vrẹ no. Yọ mẹ rẹ te kẹ owhẹ onọ whọ yare he kugbe re, efe jegbe oruaro.’

Urikri hi na eyae ivẹ etẹ wha ẹbẹbẹ ọgaga bru Solomọn. ‘Mẹ avọ aye ọnana evaọ uwou ovo ma rẹ ria,’ ere ọ jọ rai ọ tae. ‘Me te yẹ ọmọzae, nọ edẹ ivẹ evrẹ no ọye oma riẹ o te yẹ ọmọzae re. Koyehọ aso jọ ọmọ riẹ o te whu. Rekọ no mẹ jọ owezẹ, o te fi ọmọ owhowhu riẹ họ kẹle omẹ ọ tẹ rehọ ọmọ mẹ. Okenọ mẹ rọwo ze riri ọmọ owhowhu na, mẹ tẹ ruẹ nọ ọmọ mẹ ọye he.’

Aye ọdekọ ọ tẹ ta nnọ: ‘Ijo! Ọmọ ọkpokpọ na họ ọmẹ, owhowhu na họ ọ riẹe!’ Aye ọsosuọ na o te yo nọ: ‘Ijo! Ọmọ owhowhu na họ ọra, ọkpokpọ na họ ọmẹ!’ Edhere otiọna eyae na ejẹ rọ vroavro. Ovẹ Solomọn o re ti ruẹ?

Ọ tẹ ta nọ a rehọ ọgbọdọ ze, nọ a rehiẹe ze no, ọ tẹ ta nọ: ‘Bẹre ọmọ ọkpokpọ na ewẹre ivẹ, re whọ rehọ ẹwẹre kẹ aye ọvuọvo.’

‘Ijo!’ ere oni riẹ dẹẹ o bo. ‘Iviena who kpe ọmọ na ha. Rehiẹe kẹe!’ Rekọ aye ọdekọ ọ tẹ ta nọ: ‘Whọ rehiẹe kẹ omai ọvuọvo ho; ovẹrẹ bẹriẹ ewẹre ivẹ.’

Urere riẹ Solomọn ọ tẹ ta nọ: ‘Who kpe ọmọ na ha! Rehiẹe kẹ aye ọsosuọ na. Ọye họ oni riẹ dẹẹ.’ Solomọn ọ riẹ onana keme oni obọdẹ riẹ na o you ọmọ na gaga fikiere u te noi eva ze nọ a rehiẹe kẹ aye ọdekọ re a siẹe ba ekpe. Nọ ahwo ayo epanọ Solomọn o ro furie ẹbẹbẹ na, eva etẹ werae epanọ a wo ovie owareghẹ otiọye.

Eva oke esuo Solomọn, Ọghẹnẹ ọ tẹ ghale ahwo na nọ o ro ru otọ dhẹ eka buobu gbe eka-eni, ibire-idi te ireifigi gbe emuore ọfa. Ahwo a je zuo emamọ ehọ a tẹ jẹ ria iwou iwoma. Oware uwoma kpobi u te bu thesiwa rọ kẹ kohwo kohwo.