Lekyasa n Sliman
TAQSIṬ TIS 63
Lekyasa n Sliman
SLIMAN yella d ilemẓi asmi i guɣal d agellid. Iḥemmel Yahwa yerna yetbeɛ lewṣayat n lɛali i s-yefka baba-s. Sliman iɛǧeb aṭas i Yahwa, ɣef waya i s-d-ihdeṛ yiwen n yiḍ di targit, yenna-yas: ‘A Sliman, d acu tebɣiḍ a k-t-fkeɣ?’
Sliman yerra-yas: ‘A Ṛebbi-inu Yahwa, nekk meẓẓiyeɣ aṭas, ur ẓriɣ ara amek ara ḥekmeɣ. Efk-iyi-d ihi lekyasa swayes ara ḥekmeɣ ɣef wegdud-ik deg webrid n lewqam.’
Imeslayen-agi n Sliman ɛeǧben i Yahwa. Dɣa yenna-yas: ‘Imi d lekyasa i d-tessutreḍ mačči ţ-ţeɣzi n leɛmeṛ neɣ d ssɛaya, a k-fkeɣ lefhama ur yesɛi ula d yiwen uqbel-ik. A k-fkeɣ ula d ayen ur d-teḍlibeḍ ara: ssɛaya akk-d ccan.’
Iɛedda cwiṭ n lweqt, usant-ed snat n tlawin ɣer Sliman s temsalt iweɛṛen aṭas. Yiwet seg-sent tessefhem-as: ‘Nekk ţ-ţmeṭṭut-agi nezdeɣ deg yiwen wexxam. Yiwen wass, rbiɣ-d aqcic. Ɛeddan sin wussan, tesɛa-d ula d neţţat aqcic. Yiwen yiḍ yemmut mmi-s. Lliɣ ṭṭṣeɣ, dɣa teddem-ed mmi-s yemmuten, tesgen-it-id ɣur-i ma d mmi tewwi-t. Mi d-kkreɣ walaɣ llufan-nni yemmuten, ɛeqleɣ mačči d mmi.’
Lameɛna tameṭṭut-nni nniḍen tenna: ‘Xaṭi! Win akken yeddren d mmi, d mmi-s i gemmuten!’ Tameṭṭut-nni tamezwarut terra-yas: ‘Xaṭi! D mmi-m i gemmuten, win akken yeddren d mmi!’ Akka i ţmerẓant tlawin-nni zdat n ugellid. D acu ara yexdem Sliman?
Iceggeɛ a s-d-awin ajenwi. Mi s-t-id-wwin, yenna: ‘Gezmet llufan yeddren ɣef sin, tefkem azgen i yiwet, azgen i tayeḍ.’
Lameɛna yemma-s n ṣṣeḥ, tsuɣ: ‘Xaṭi! Di leɛnaya-k, ur t-neqqet ara, fket-as-t i neţţat!’ Lameɛna tameṭṭut-nni nniḍen tenna: ‘Ur t-teţţawi ula d yiwet seg-nneɣ; gezmet-eţ ɣef sin!’
Ɣer taggara inṭeq-ed ugellid Sliman: ‘Ur t-neqqet ara! Fket-eţ i tmeṭṭut tamezwarut. D neţţat i d yemma-s n ṣṣeḥ.’ Sliman yeɛqel belli d yemma-s n ṣṣeḥ axaṭer tḥemmel mmi-s armi axiṛ-as a t-tefk i tmeṭṭut-nni nniḍen wala a t-nɣen. Mi slan wat Isṛayil amek i gefra Sliman tamsalt-a, feṛḥen aṭas imi sɛan agellid ukyis am neţţa.
Ddaw n leḥkem n Sliman, Ṛebbi iburek agdud. Akal yeţţak-ed s tawant irden ţ-ţemẓin, tiẓurin ţ-ţbexsisin d lerẓaq meṛṛa nniḍen. Agdud yeţlusu llebsa yetɛeddan yerna yezdeɣ deg yexxamen yelhan. Lɣaci meṛṛa llan di liser.
