SOLOMONE wajinga mwanyike kimye kyo aikele ke mfumu. Wamutemenwe Yehoba kabiji walondejilenga mafunde amupele shanji, aye Davida. Solomone watokeshenga bingi Yehoba ku muchima kabiji juba jimo bufuku, bamwambijile mu kiloto amba: ‘Solomone, ki ka kyo usaka kulomba kwi amiwa, nkupe?’

Solomone wakumbwile’mba: ‘Anweba Yehoba Lesa wami, amiwa ne mwanyiketu mucheche kabiji naluba mwa kulamina bantu. Onkao mambo, mpai maana a kulaminamo bantu benu bulongo.’

Kintu kyalombele Solomone kyamutokeshe Yehoba ku muchima. Yehoba waambile’mba: ‘Byo walomba maana ne kulomba bumi bwakulaila nangwa bunonshi ne, nsakukupa maana akila kukila muntu yense pa ntanda. Bino, nsakukupa ne byo waji kubula kulomba, bunonshi ne buneme.’

Palutwe kacheche, banabakazhi babiji bajinga na lukatazho lukatampe, baishile kwi Solomone. Umo waambile’mba: ‘Uno mukwetu twikala nanji nzubo imo. Nasemene mwana wa mulume, kabiji byo papichile moba abiji naye wasemene mwana wa mulume. Kabiji juba jimo bufuku mwananji wafwile. Bino, amiwa byo najinga mu tulo, aye washikwile mwananji wafwa wamubika mu kyaji kyami ne kusendako mwanami. Byo nabukile lukelo ne kutajisha mwana wafwile, namwene’mba kechi wajinga wami ne.’

Mwanamukazhi mukwabo waambile’mba: ‘Ine! Uno mwana mumi wami, awo wafwa ye wanji!’ Mwanamukazhi mutanshi wakumbwile’mba: ‘Ine! Uno mwana wafwa wobe, awe mumi ye wami!’ Bino byo byo bepachikilenga bano banabakazhi. Solomone waubilepo byepi?

Watumine muntu amba bamuletele mpoko, kabiji byo baletele waambile’mba: ‘Uno mwana mumi mwabanyai mu bibese bibiji, mwibape banabakazhi au kimo, au kimo.’

Mwina yewa mwana mumi wajijile ne kwamba’mba: ‘Ine! Mwane, kange mumwipaye mwana ne. Mupanai ku mukwetu!’ Bino, mwanamukazhi mukwabo waambile’mba: ‘Kange mumupane ku umo pe atweba ne, mwabanyaipo.’

Ponkapo, Solomone waambile’mba: ‘Kange mumwipaye ne! Mupanai ku yewa mwanamukazhi mutanshi. Mambo ye mwina mwana.’ Solomone wayukile kino mambo mwine mwina mwana watemenwe mwana kya kuba waambile ne kuba’mba bamupane ku mwanamukazhi mukwabo kwa kubula kumwipaya. Bantu byo baumvwine mwachibijile Solomone ano mambo, batemenwe bingi ne kwamba’mba bajinga na mfumu wa maana.

Kimye kyalaminenga Solomone, Lesa wapesheshe bingi bantu kupichila mu kumenesha wichi, mbaale ne mañanzañanza avula bingi kubikapotu ne kajo kakwabo. Bantu bavwajilenga bivwalo byawama bulongo ne kwikala mu mazubo awama. Bantu bonse mu ntanda baikele bwikalo bwawama mambo kafwako muntu nangwa umo wakajilwe kintu ne.