SƆLƆMƆN bin yɔŋ we i bi kiŋ. I lɛk Jiova, ɛn i bin de fala di gud advays we in papa bin gi am. Jiova bin gladi fɔ Sɔlɔmɔn. So wan nɛt i tɔk to Sɔlɔmɔn pan drim se: ‘Sɔlɔmɔn, wetin yu want mek a gi yu?’

Sɔlɔmɔn ansa se: ‘Jiova, mi na smɔl smɔl bɔbɔ ɛn a nɔ no aw fɔ rul. So na fɔ gi mi sɛns fɔ no aw fɔ rul yu pipul dɛn di we aw yu want.’

Di tin we Sɔlɔmɔn aks fɔ mek Jiova gladi. So i tɛl Sɔlɔmɔn se: ‘Bikɔs yu aks fɔ sɛns ɛn yu nɔ aks fɔ lɔng layf ɛn jɛntri, a go gi yu bɔku sɛns we nɔbɔdi nɔ ɛva gɛt. Ɛn a go gi yu bak wetin yu nɔ aks fɔ. A go gi yu bɔku jɛntri ɛn a go mek pipul dɛn rɛspɛkt yu.’

Afta sɔm tɛm, tu uman dɛn kam wit wan big prɔblɛm to Sɔlɔmɔn. Wan pan dɛn tɔk se: ‘Mi ɛn dis uman de na di sem os. A bɔn bɔy pikin, ɛn afta tu dez insɛf bɔn bɔy pikin. Dɔn wan nɛt in pikin day. Bɔt we a bin de slip, i put in pikin we dɔn day nia mi ɛn tek mi yon pikin. We a wek ɛn luk di pikin we dɔn day, a si se nɔto mi pikin.’

Bɔt di ɔda uman se: ‘Nɔ, na mi gɛt di pikin we gɛt layf ɛn na in yon dɔn day!’ Di fɔs uman tɔk bak se: ‘Nɔ, na in yon pikin dɔn day ɛn na mi yon gɛt layf!’ Na so di uman dɛn bin de agyu dɛnsɛf. Wetin Sɔlɔmɔn go du?

I sɛn mek dɛn kam wit sɔd. We dɛn kam wit am, i se: ‘Kɔt di pikin we gɛt layf midul ɛn gi di uman dɛn af-af.’

Di uman we bɔn di pikin kray se: ‘Duya, una nɔ kil di pikin. Una gi am di pikin!’ Bɔt di ɔda uman tɔk se: ‘Una nɔ gi ɛniwan pan wi; una kɔt am midul.’

Afta di uman dɛn dɔn tɔk ɔl dis, Sɔlɔmɔn se: ‘Nɔ kil di pikin! Gi am to di fɔs uman. Na in bɔn di pikin.’ Aw Sɔlɔmɔn no se na dis uman bɔn di pikin? I si se di uman lɛk di pikin. Ɛn di uman nɔ bin want mek dɛn kil di pikin, so na dat mek i bin se mek dɛn gi di ɔda uman. We di pipul dɛn yɛri aw Sɔlɔmɔn sɔlv dis prɔblɛm, dɛn gladi fɔ gɛt kiŋ we gɛt sɛns.

Di tɛm we Sɔlɔmɔn bin de rul, Gɔd blɛs di pipul dɛn. I mek plɛnti plɛnti tin fɔ it gro. Di pipul dɛn bin de wɛr fayn klos ɛn dɛn bin de na fayn os dɛn. Ɔlman bin de ɛnjɔy!