TA̱ Salomón loʼoníra tá ni̱xa̱a̱ra ku̱ura rey. Kúni̱níra xínira Jehová, ta ndíku̱nra consejo ña̱ ta̱xi yivára ta̱ David ndaʼa̱ra. Jehová kúni̱níra xínira ta̱ Salomón, xa̱ʼa ña̱yóʼo iin ñu̱ú xíʼin iin xa̱ni ni̱ka̱ʼa̱nra xíʼinra: ʼSalomón, ¿ndáaña kúni̱ún ta̱xii̱ ndaʼún?ʼ

Ta̱ Salomón nda̱kuiinra: ʼJehová, iin ta̱ loʼo kúi̱ ta va̱ása xíni̱i̱ kaʼndachíñu va̱ʼi̱ nu̱ú na̱ ñuún. Ña̱kán taxi ña̱ ndíchi ndaʼíi̱ ña̱ va̱ʼa kaʼndachíñui̱ nu̱únaʼ.

Ni̱kusi̱í-ini Jehová xíʼin ña̱ ndu̱kú ta̱ Salomón nu̱úra. Ña̱kán ni̱ka̱ʼa̱nra xíʼinra: ʼXa̱ʼa ña̱ ndu̱kún ña̱ ndíchi nu̱íi̱ ta kǒo níndukún ña̱ káni tiempo koún, ni ña̱ ku̱i̱ká va̱ása níndukún, ta yi̱ʼi̱ ku̱a̱ʼání ña̱ ndíchi taxii̱ ndaʼún ni iin na̱ yiví na̱ ni̱xi̱yo tá ya̱chi̱ kǒo níxi̱kuumií ña̱yóʼo. Ta su̱ví ña̱yóʼo kuití taxii̱ ndaʼún chi taxii̱ ña̱ va̱ása níndukún nu̱íi̱, taxii̱ ña̱ ku̱i̱ká ndaʼún xíʼin ña̱ kuún iin ta̱a káʼnuʼ.

Ni̱ya̱ʼa loʼo tiempo ki̱xa̱a̱ u̱vi̱ ná si̱ʼí nu̱ú ta̱ Salomón xíʼin iin ku̱a̱chi. Ki̱xaʼá iinñá káʼa̱nñá xíʼinra: ʼÑáyóʼo xíʼin yi̱ʼi̱ iin veʼe ndóondi̱. Ka̱ku iin ta̱ lée loʼo se̱ʼi̱ ta ni̱ya̱ʼa u̱vi̱ ki̱vi̱ ta ka̱kutu ta̱ loʼo se̱ʼe ñáyóʼova. Soo iin ñu̱ú ni̱xi̱ʼi̱ se̱ʼeñá. Tá kísi̱i̱, ki̱xiñá chi̱ndúʼuñá ta̱ loʼo se̱ʼeñá ta̱ ni̱xi̱ʼi̱, ta nda̱kiʼinñá ta̱ loʼo se̱ʼi̱ ku̱a̱ʼa̱n xíʼinñá. Tá ndu̱kaxi-inii̱ ta xi̱nii̱ ta̱ loʼo ni̱xi̱ʼi̱ yóʼo, su̱ví se̱ʼi̱ kúúraʼ.

Tá xi̱niso̱ʼo inkañá ña̱yóʼo, ki̱xaʼáñá káʼa̱nñá: ʼSu̱ví ña̱ ndixa kúú ña̱ káʼa̱nñá. Se̱ʼe miívañá kúú ta̱ loʼo ni̱xi̱ʼi̱, ta̱ táku yóʼova kúú se̱ʼi̱ʼ. Tasaá nda̱kuiin ñá nu̱ú: ʼSu̱ví ña̱ ndixa kúúña káʼún ta̱ loʼo ta̱ ni̱xi̱ʼi̱va kúú se̱ʼún, ta̱ táku yóʼova kúú se̱ʼi̱ʼ. ¿Ndáaña keʼé ta̱ Salomón vitin?

Ndu̱kúra iin yuchu̱, tá ki̱xa̱a̱ña xíʼinna, ta káchira saá: ʼU̱vi̱ táʼvi kaʼndandó ta̱ loʼo táku yóʼo, ta iin ñáʼñu taxindó ndaʼa̱ iin iinnáʼ.

Míí ñá xíʼin se̱ʼe ni̱nda̱ʼyi̱ kóʼóñá, ta káchiñá: ʼVa̱ása kaʼndandóra. Va̱ʼaka taxindóra ndaʼa̱ ñáyóʼovaʼ. Soo ñá inka, káchiñá: ʼVa̱ʼaka kaʼndandóra, nda̱a̱ ni iindi̱ va̱ása taxindóra ndaʼa̱ʼ.

Tasaá ni̱ka̱ʼa̱n ta̱ Salomón: ʼVa̱ása kaʼníndó ta̱ lée loʼo yóʼo. Taxindóra ndaʼa̱ ñá nu̱ú. Chi ña̱yóʼo kúú siʼíraʼ. Ta̱ Salomón na̱kunda̱a̱-inira ña̱yóʼo, saáchi míí ñá ndixa xíʼin se̱ʼe kúʼvi̱ní-iniñá xíniñára, nda̱a̱ ni̱ka̱ʼa̱nñá ta̱xinara ndaʼa̱ inkañá, ña̱ ná kǒo kaʼnínara. Tá na̱kunda̱a̱-ini na̱ ñuu ña̱ va̱ʼaní ti̱in ta̱ Salomón ku̱a̱chi xíʼin ná si̱ʼí yóʼo, ni̱kusi̱íkaví-inina ña̱ íyo iin rey ta̱ ndíchi ñuuna.

Tá tiempo xa̱ʼndachíñu ta̱ Salomón, Ndióxi̱ ta̱xira bendición ndaʼa̱ na̱ ñuura, va̱ʼaní xi̱kana ña̱ʼa nu̱ú ñuʼúna, xi̱kana trigo, cebada, uva xíʼin ndiʼika inka ña̱ʼa kuxuna. Va̱ʼakaví ti̱ko̱to̱ xi̱ndixina ta va̱ʼakaví veʼe nu̱ú xi̱ndoona. Ndiʼi ña̱ʼa va̱ʼa ni̱xi̱yo nu̱úna.