TLAPOUALISTLI 63

Salomón okatka se ueyi tekiua ixtlamatki

SALOMÓN okatka telpochtli ijkuak omochi ueyi tekiua. Okitlasojtlaya Jehová, uan okichi ijkon ken okinojnotski itajtsin David. Salomón okiyolpakti Jehová, ik non, se yoak okilui itech se kochtemikilistli: ‘Salomón, ¿tlen tikneki ma nimitsmaka?’.

Uan Salomón otlanankili: ‘Jehová noDios, san nitelpochtli uan amo nikmati ken nitlanauatis. Ik non, xinechmaka ixtlamatilistli pampa kuali nikyekanas moaltepetl’.

Jehová okipakti tlen Salomón okitlajtlanili. Ik non, okilui: ‘Pampa otiktlajtlanki ixtlamatilistli uan amo miak tonal tiyoltos nion tomin, nimitsmakas miak ixtlamatilistli tlen amo keman se tlakatl yokipixki. Nimitsmakas nin, uan noijki ne nimitsmakas tlamantli tlen amo otinechtlajtlanili, kema, nimitsmakas miak tomin uan nikchiuas xiueyitito’.

Satepan, ome siuamej oyajkej ixpan Salomón ika se ouijkayotl. Se siuatl okijto: ‘Nin siuatl uan ne otichantiayaj san itech se kali. Ne onikpixki nokone, uan ome tonal satepan ye noijki okipixki ikone. Se yoak, ikone ye omikik. Uan ijkuak ne onikochtoka, ye okitlali nonakastlan ikone tlen yomikik uan okiuikak nokone. Ijkuak onijsak onikitak konetl tlen yomikik, uan onikitak amo noaxka okatka’.

Ijkuak okikak nin, okse siuatl okijto: ‘¡Amo! ¡Konetl tlen yoltok noaxka uan konetl tlen yomikik ye iaxka!’. Achto siuatl okijto: ‘¡Amo! ¡Tlen yomikik moaxka uan tlen yoltok noaxka!’. Ijkon omonanankilijkej siuamej. ¿Tlen kichiuaskia Salomón?

Okitlajtlanki se espada, uan, ijkuak okiualikilijkej, okijto: ‘Xiktlajkotekikan konetsintli tlen yoltok, uan xikinmakakan tlajtlajko sejse siuatl’.

Akin melauak inantsin konetsintli okijto: ‘¡Amo! Namechtlatlaujtia, amo xikmiktikan konetsintli. ¡Xikmakakan ye!’. Maski ijkon, okse siuatl okijto: ‘Nion se itech tejuan xitechmakakan; xiktlajkotekikan’.

Axkan Salomón okijto: ‘¡Amo xikmiktikan konetsintli! Xikmakakan achto siuatl. Ye akin melauak inantsin konetsintli’. Salomón okimatki nin pampa akin melauak nantsin okitlasojtlaya miak ikone, ik non, okitekauili ma kimakakan okse siuatl pampa amo kimiktiskiaj. Ijkuak tlaltikpaktlakamej okikakej ken Salomón okiyektlali nin ouijkayotl, oyolpakej miak pampa okipiayaj se ueyi tekiua tlen okatka ixtlamatki.

Ijkuak Salomón okatka ken ueyi tekiua, toTajtsin Dios okiteochi altepetl uan otlamochiuaya ika trigo uan cebada, uvas uan higos uan okseki tlakuali. Tlaltikpaktlakamej okipiayaj kuali intlaken uan ochantiayaj itech kuali kalmej. Okatka miak tlamantli tlen kuali pampa nochtin.

1 Reyes 3:3-28; 4:25-34.