Tekiuaj Salomón tlamachilise
Historia 63
Tekiuaj Salomón tlamachilise
SALOMÓN san se telpochtsintli ijkuak kitlaliaj kentla tekiuaj. Yejua kitlasojtla Jehová, niman kichiua tlen okijli itaj David. Salomón kiyolpaktia Jehová, ika yejon, se yeuajli toTajtsin kijlia ipan se temiktli: ‘Salomón, ¿tlenon tikneki manimitsmaka?’
Salomón kinankilia: ‘NoTajtsin Jehová, nejua san se nitelpokatsin niman xnikmati kenon nitekiuajtis. Kuakon, xnechmaka tlamachilistli niman ijkon uelis kuajli nikyekanas mokalpan’.
Jehová kuelita tlen kitlajtlani Salomón. Ika yejon, kijlia: ‘Pampa otiktlajtlan tlamachilistli niman xotiktlajtlan uejkaujtipan tinemis nion miyek tomin, nimitsmakas tlamachilistli ken xakaj ijkon kipiya. San ika, nejua noijki nimitsmakas tlen xotiktlajtlan, kema, nimitsmakas miyek tomin niman ueyilistli’.
Sakin, omemej siuamej ouajlakej itech Salomón ika se tlauejli ueyi. ‘Yejuin siuatl niman nejua tichantij san sekan ipan se kajli’, peua kijtoua se. ‘Nejua oniktlakatili se konetsintli, niman opanok ome tonajli yejua noijki okitlakatili se konetsintli. Se yeuajli, ikonetsin omik. Ijkuak nejua nikochiya, yejua okitlali konetsintli akin yomik nonakastlan niman okuikak nokonetsin. Ijkuak oninokuiteuj, onikitak konetsintli akin omik, nimantsin onikixmat ika xnokonetsin katka.’
Ijkuak okikak yejuin, okse siuatl kijtoua: ‘¡Ka! ¡Konetsintli akin yoltika notlatki niman akin yomik yejua itlatki!’ Siuatl akin kachtopa otlajto kijtoua: ‘¡Ka! ¡Akin yomik motlatki niman akin yoltika nejua notlatki!’ Ijkon nokualaniaj siuamej. ¿Tlenon kichiua Salomón?
Kitlajtlani se espada, niman ijkuak kuajkuiliaj kijtoua: ‘Xtlajkotekikan konetsintli, niman xkinxelouilikan siuamej’.
‘¡Maka!’, tsajtsi akin yemelak nantli. ‘Nimechtlajtlanilia, maka xmiktikan konetsintli. ¡Yejua xmakakan!’ San ika, okse siuatl kijtoua: ‘Xtlajkotekikan niman maka yakaj iuan manokaua’.
Aman Salomón kijtoua: ‘¡Maka nenkimiktiskej konetsintli! Xmakakan yejon kachtopa siuatl. Yejua yemelak nantli’. Salomón kimati yejuin pampa akin yemelak nantli kitlasojtla ikonetsin, kinektika kitemakas niman ijkon maka makimiktilikan. Ijkuak okitekakilijkej tlaltikpakchanejkej kenon Salomón okiyektlali tlauejli, pakij ika kipiyaj se tekiuaj tlamachilise.
Ijkuak Salomón tekiuajti, toTajtsin kinteochiua israelitas pampa kichiua miyek matlaki trigo niman cebada, uvas iuan higos niman okseki tlakuajli. Tlaltikpakchanejkej kuajli notlakentiaj niman kuajli chantij. Nochimej kipiyaj tlen kuajli.
