SALOMÓN alaj na chiʼ xubʼan ajawinel. Sibʼalaj kuloqʼoqʼej ri Jehová, xuqujeʼ xubʼan ri xretaʼmaj chirij ri utat ubʼiʼ David. Jehová utz kril ri Salomón, rumal laʼ pa jun chaqʼabʼ xubʼij wariʼ che pa uwaram: ‹Salomón, ¿su kawaj kinya chawe?›

Salomón xubʼij wariʼ: ‹Jehová nuDios, in alaj na wetaʼm täj kinbʼan qʼatbʼaltzij pa kiwiʼ ri winaq. Rumal laʼ chaya nunojibʼäl rech kinbʼan jun utzalaj ajawinel pa kiwiʼ ri atinamit›.

Ri Jehová utz xril ri xuta Salomón. Rumal laʼ xubʼij: ‹Rumal che ataʼom nojibʼäl, are ta xata nim akʼaslemal xuqujeʼ nim pwäq, kinya jun nimalaj anojibʼäl chuwäch konojel winaq. Xuqujeʼ kinya ri nikʼaj chik jastaq che xata täj, kinya nim pwäq chawe xuqujeʼ kinbʼan chawe che nim aqʼij›.

Xqʼax kebʼ oxibʼ qʼij tekʼuriʼ xeʼopan kebʼ ixoqibʼ rukʼ Salomón rumal che kʼo chʼoj che kixoʼl. Are xkebʼij wariʼ: ‹In xuqujeʼ wajun ixoq xa junam ja ojkʼo wi›, xchaʼ jun chike. ‹In xkʼejeʼ jun alaj wal ala, tekʼuriʼ wajun ixoq riʼ xuqujeʼ xkʼejeʼ jun alaj ral ala. Pa jun chaqʼabʼ, xkam ri ral. Tekʼuriʼ chiʼ in tijan kinwarik, areʼ xuya ri ral kamnäq chik che nunaqaj tekʼuriʼ xukʼam bʼi ri wal in. Chiʼ xinwaʼlajik xinwilo che ri neʼ kamnäq, are ta ri wech in.›

Chiʼ xuta wariʼ, ri jun chik ixoq xubʼij: ‹¡Je täj! ¡Ri neʼ kʼaslik are wech in, ri neʼ kamnäq rech areʼ!› Ri nabʼe ixoq xubʼij wariʼ: ‹¡Je täj! ¡Ri kamnäq are awech at, are wech in ri kʼaslik!› Tijan kkebʼan chʼoj wa kebʼ ixoqibʼ. ¿Su kubʼan na Salomón rukʼ wariʼ?

Salomón xuta jun chʼichʼ, chiʼ xkʼam lo che, xubʼij wariʼ: ‹Chiqʼataʼ pa kebʼ ri neʼ kʼaslik, tekʼuriʼ chiya jujun chʼaqap chike wa kebʼ ixoqib›.

‹¡Kibʼan täj!› Xchaʼ ri qastzij unan ri neʼ. ‹Chibʼana jun toqʼobʼ, xaq mikamsaj ri neʼ. ¡Chiya bʼi che ri ixoq!› Tekʼuriʼ ri jun chik ixoq xubʼij: ‹Chiqʼataʼ pa kebʼ ri neʼ, xaq miya che nijun chaqe›, xchaʼ.

Kimik Salomón xubʼij wariʼ: ‹¡Xaq mikamsaj ri neʼ! Chiya bʼi che ri nabʼe ixoq. Are ri qastzij unan›. Salomón retaʼm wariʼ rumal che ri qastzij unan sibʼalaj kuloqʼoqʼej ri ral, rumal che xraj kuya bʼi che jun chik ixoq rech kkam täj. Chiʼ ri winaq xketo che Salomón xkun che rilik wajun chʼoj, xekikotik ri winaq rumal che kʼo jun kajawinel nim unojibʼäl.

Pa täq qʼij chiʼ xubʼan ajqʼatbʼaltzij Salomón, ri Ajawaxel xuya nim tewchibʼäl chike ri tinamit, xubʼan che ri ulew kuya kʼi trikö rukʼ cebada, uvas rukʼ higos xuqujeʼ nikʼaj chik täq ktijowik. Ri winaq kʼo utzalaj täq katzʼyaq xuqujeʼ kʼo utzalaj täq kachoch. Kʼo kikotemal che kixoʼl konojel.