TE MAPU ra rai a Solomona i riro mai ei aia ei ariki. Inangaro aia ia Iehova, e kua aru i te ako meitaki tei orongaia mai kiaia e tona papa ko Davida. Mareka katoa a Iehova ia Solomona, e i tetai po kua karanga kiaia i roto i te moemoea e: ‘Solomona, eaa taau ka inangaro kia oronga atu au naau?’

Kua pau atu a Solomona e: ‘E taku Atua e Iehova, te tamariki nei rai au e kare oku kite i te tutara. No reira e oronga mai koe i te pakari noku kia tutara ki rungao i toou iti tangata i roto i te mataara tika.’

Kua mareka a Iehova i ta Solomona i pati mai. No reira Aia i tuatua ai e: ‘No te mea kua pati mai koe i te pakari, e kare i pati mai i tetai oraanga roa me kore i te apinga nui noou, ka oronga atu au kia maata atu toou pakari i tetai ua atu tangata tei ora ana. Inara ka oronga katoa atu au kia koe taau kare i pati mai, te apinga nui e te kaka.’

Tetai tuatau poto i muri mai kua aere mai tetai nga vaine e to raua manamanata ngata kia Solomona. ‘E noo ana maua ko teia vaine ki roto i tetai are,’ i akamarama mai ei tetai ia raua. ‘Kua anau au i taku tamaiti, e e rua ra i muri mai kua anau katoa aia i tana pepe tamaroa. I tetai po kua mate tana pepe. Iaku e moe ra, kua tuku aia i tana pepe mate ki te pae iaku e kua apai i taku pepe. I toku ara mai anga e te akara anga i te pepe mate, kua kite au e kare e naku teia pepe.’

I reira kua karanga tetai mai vaine e: ‘Kare! Naku te pepe ora, e nana tei mate!’ Kua pau mai te vaine mua e: ‘Kare! Naau te pepe mate e naku te mea ora!’ Te tu teia i maro ei teia nga vaine. Ka akapeea ra a Solomona?

Kua tono aia kia tikiia tetai koke, e i te apaiia anga mai kua karanga aia e: ‘Tipu i te pepe ora ki rotopu, oronga e tai apa na tetai, e tetai apa na tetai mai.’

‘Kare!’ i aue ei te mama tikai. ‘Auraka e ta i te pepe. Oronga ia kiaia!’ Karanga tetai mai vaine e: ‘Auraka e oronga mai i te pepe na maua; tipu i te pepe ki rotopu.’

I te openga kua tuatua mai a Solomona e: ‘Auraka e ta i te tamaiti! Oronga iaia ki te vaine mua. Koia te mama tikai.’ Kua kite a Solomona i teia no te mea e inangaro maata tikai tona mama i tana pepe e kua inangaro ua aia i te oronga atu iaia na tetai vaine mai, kia kore aia e tamateia. Te akarongo anga te tangata e i akapeea a Solomona i te akatikatika anga i te manamanata, mataora tikai ratou i to ratou ariki kite pakari.

I te tuatau o te tutaraanga a Solomona, kua akameitaki te Atua i te iti tangata na te maani anga kia ua maata te titona e te manga, te vine e te suke e tetai atu au kai. Aao te tangata i te au kakau manea e kua noo ki roto i te au are meitaki. Maata ua atu te au mea memeitaki na te tangata ravarai.