SALAMOONI nugusa ikki yannara qaaqqoho. Isi Yihowa baxanno; qoleno annisi Daawiti uyinosi amaale haˈrunsino. Yihowa Salamooni baxino daafira mitto hashsha haaqetenni, ‘Salamooni, ma aammohera baxatto?’ yiisi.

Hakkiinnino Salamooni, ‘Maganoˈya Yihowa, qaaqqo ikkoommo daafira manna hiitto asse gashsheemmoro diafoommo. Konni daafira mannakki garunni gashsheemmo gede hayyo uyie’ yee qoli.

Yihowa Salamooni xaˈmirinori hagiirsiisisi. Konni daafira togo yiisi: ‘Lowo diro heeˈra woyi jiro xaˈmira agurte hayyo xaˈmiroottohura, ayino afiˈrinokki hayyo eemmohe. Xaˈmiroottokkire jironna ayirrinynye nafa lede eemmohe.’

Shiima yanna gedensaanni lame meenti lowo geeshsha qarrame Salamooniwa mari. Lamente giddo mitte togo yite qarransa kultu: ‘Tini manchonna ani mitto mine heeˈneemmo. Ani labbaa qaaqqo ilumma; ani ilummahunni sayikkita iseno labbaa qaaqqo iltu. Hakkiinnino mitto hashsha ise qaaqqi reyi. Ani goxe heeˈreenna, iseha reyino qaaqqo ane mule worte aneha adhitu. Goxoommawiinni baqqi yee reyino qaaqqo laeemma wote, dianeho.’

Tiˈi mancho qoltannoti, ‘Deeˈni! Lubbote noo qaaqqi aneho; reyinohu iseho!’ yitu. Umo coyidhuti kayinni, ‘Deeˈni! Reyinohu ateho; lubbote noohu aneho!’ yite qoltu. Lamenti hatto yaanni heewisami. Xa Salamooni ma assakka?

Salamooni bise abbinasira soyi; bise abbinita, ‘Lubbote noo qaaqqo lamewa murtine, lamentera beekke’ yii.

Qaaqqu ama qoonqose gotti assite, ‘Deeˈni! Eeggatena qaaqqo hanni shii. Isera uyi!’ yitu. Tiˈi mancho kayinni, ‘Lamentera uyitooti; lamewa murte beehinke’ yitu.

Goofimarchohono Salamooni, ‘Qaaqqo shitinoonte! Umo coyidhu manchora uyiyye. Qaaqqu ama iseetina’ yii. Salamooni tenne afinohu, qaaqqu ama qaaqqose lowo geeshsha baxxinohura reyannokki gede wole manchora uyinanni gede coyiˈrasenniiti. Mannu Salamooni konne qarra tirino gara macciishshiti, togooha hayyichcha nugusa afiˈransanni hagiidhi.

Salamooni gashshooti waro, baatto lowo sindenna hayixe, woyinenna belese hattono wole sagale fushshitanno gede asse Maganu manna maassiˈri. Hakkawaro mannu dancha uduunne uddiˈranno; danchu minirano galanno. Mittu mittunku manchira danchuri baalunku woˈme noosi.