JA Salomón juni yal keremto yajni och mandaranumi. Ja yeʼn wa syajtay ja Jyoba sok wani skisa ja rasonik ajikanyi yuj ja stat David. Jyoba lekni xyila ja Salomón, ja yuj jun akʼwal, bʼa jun wayichal yala yabʼ: «Salomón, ¿jasa waxa kʼana oj kawi?».

Ja Salomón sjakʼa: «Jyoba kala Dyos, jelto keremon sok mi xnaʼa jastal oj kaʼ mandar. Ja yuj, wa xkʼana oj awaki jbiboʼil bʼa oj jnaʼ jastal oj kaʼ mandar toj ja wa chonabʼi».

Jyoba lekni yabʼ ja jasa skʼana ja Salomón, ja yuj yala yabʼ: «Yuja kʼana oj kawi abiboʼil sok mi akʼana albʼel asakʼanil sok arikesaʼil, ojni kawi jitsan abiboʼil bʼa mini june ma kaʼunej yi man weʼgo. Pe mi kechanuk ja jaw: chomajkil oj kawi ja jastik mi akʼanakiʼi, jaʼi, oj kawi jitsana rikesaʼil sok jel oj kʼot najuk abʼaj».

Tʼusan tyempo tsaʼan jakye sbʼaj ja Salomón chabʼ ixuk sok jun skʼumale. Ja jun ixuki yala: «Ja ixuk it soka keʼn junxta naʼits aytikon. Ja keʼn ajyikuj jun yal kalats, pe bʼa yoxil kʼakʼukʼot ja yeʼn chomajkil ajyiyuj june. Jun akʼwal, ja yalats ja yeʼn chami. Sok yajni ja keʼn wanon wayel, ja yeʼn jak yakan ja yawal yal chamelxa bʼa jtsʼeʼel sok yiʼaj elki ja jbʼaji. Yajni kaʼa jbʼaji sok kila ja yal chamel alatsi, jnaʼa mini jbʼajuka».

Jaxa juni yajni yabʼ ja it, yala: «¡Miyuk! ¡Ja yal alats sakʼani keʼn jbʼaj, sok jaxa bʼa chamel xa yeʼn sbʼaj!». Ja bʼajtan ixuki yala: «¡Miyuk! ¡Ja bʼa chamelxa weʼna bʼaj, jaxa bʼa sakʼani keʼn jbʼaj!». Jachʼni wane yaljel sbʼaje ja ixukeʼi. ¿Jastal maʼ oj stojbʼes ja kʼumal it ja Salomón?

Skʼana jun espada, sok yajni ijijani, yala: «Tʼajawik snalan ja yal alats sakʼani, sok awikyi snalantik ja ixukeʼi».

Ja mero nanali awani yaljel: «¡Miyuk! ¡Aʼawa paborex, moka mil-ex ja yal alatsi! Awikyi yeʼna». Pe ja juni yala: «Miyuk, moka wayi mini june bʼa keʼntikon; tʼajawik snalan».

Tixa yala Salomón: «¡Moka mil-ex ja yal alatsi! Awikyi ja bʼajtan ixuki, yeʼnani ja mero nanali». Salomón snaʼani ja it yujni ja mero nanali jel syajtay juntiro ja yal alatsi, ja yuj yala aʼajuk yi ja bʼajtan ixuki bʼa mi oj miljuk. Yajni ja ixuk winik jumasaʼ yabʼye ja jastal stojbʼes ja kʼumal it ja Salomón, jel gustoʼaxiye yuj ja ayiʼoje jun mandaranum jel bibo.

Ja janekʼ tyempo albʼi ja smandaranel ja Salomón, ja Dyosi ya koʼ slekilal ja chonabʼi yajni skʼulan ja luʼumi aya jitsan trigo, cebada, tsʼusubʼ, higo sok tuktukil waʼelal. Ja ixuk winiki lekik kʼuʼuts wa slapawe sok ay lekik snaje. Yibʼanale ayiʼoje ja jastik wa xmakuni yujileʼi.