SALOMÓN kajku aktsu kgawasa xwanit akxni chalh xlimapakgsina. Salomón lu paxkiy Jehová, chu chuna tlaway la stakyawalh xtlat David. Jehová lu paxkiy Salomón wa xlakata akgtum katsisni kxtamanaxnat wanilh: Salomón, ¿tuku lakgatiya nakmaxkiyan?

Chu Salomón kgalhtinalh: Jehová kiDios akit kajku kgawasa chu nikkatsi la nakmapakgsinan. Wa xlakata kakimaxki liskgalala xlakata tlan nakmapakgsiy minkachikin.

Jehová tlan akxilhli tuku Salomón skinilh. Wa xlakata waniy: Xlakata skinti liskgalala chu ni skinti makgas nalatapaya o lhuwa nakgalhiya tumin, nakmaxkiyan tlakg lhuwa liskgalala la nitiku akgalhi unu kKatiyatni. Pero ni kajwatiya tama nakmaxkiyan, na nakmaxkiyan wantuku nitu skinpat, xlikana nakmaxkiyan lhuwa tumin chu lilanka.

Ni makgas alh kilhtamaku, lakgminkgolh Salomón chatiy lakpuskatin chu xliminkgoy akgtum lanka taʼakglhuwit. Chu chatum wan: Uma puskat chu akit akxtum kwilaw kchiki. Akit kkgalhilh chatum aktsu skgata, chu titaxtulh akgtiy kilhtamaku uma puskat na kgalhilh chatum kskgata. Akgtum katsisni, kskgata uma puskat nilh. Chu akxni akit xaklhtatama, wililh kskgata kkinpaxtun chu lilh kiskgata. Chu akxni akit klakgawa akit kʼakxilhli pi xanin skgata nikila xwanit.

Akxni kgaxmatli uma atanu puskat, wan: ¡Nixlikana! ¡Xastakna skgata kila chu xanin skgata xla! Chu puskat wantiku xapulana xchuwinanit wan: ¡Nixlikana! ¡Xanin skgata mila chu xastakna kila! Chuna takglhuwimakgolh uma lakpuskatin. ¿La nalakkaxtlaway Salomón uma taʼakglhuwit?

Skilh akgtum espada, chu akxni liminka, wan: Itat kalakchukutit aktsu skgata wa nema xastakna, chu itat kamaxkitit chatum chu itat achatum.

Wantiku lu xaxlikana xtse aktsu skgata pixlanka wan: ¡Ni, ni kamakgnitit! Kamaxkitit tama puskat. Chu achatum puskat wan: Nitiku kamaxkitit kalakchukutit.

Chu Salomón wan: ¡Ni kamakgnitit aktsu skgata! Kamaxkitit puskat wantiku pulana chuwinalh. Wa lu xaxlikana xtse. Salomón katsiy pi wa xtse xlakata lu xaxlikana paxkiy chu katsilh akxni xatse wa, pi kamaxkika achatum puskat xlakata ni namakgnikan. Akxni kgaxmatkgolh kristianos la Salomón lakkaxtlawalh tama taʼakglhuwit, lu lipaxuwakgoy pi lu xaskgalala xmapakgsinakan.

Dios sikulanatlawa kachikin akxni Salomón mapakgsinan, kamaxkiy trigo chu cebada, uvas chu higos chu katuwa amakgapitsi tuku wakan. Chu kristianos kgalhikgoy lu xalaktlan xlhakgatkan chu xalaktlan xchikkan. Lhuwa anan tuku xatlan, chu kaʼakchani xputumkan.