LI SALOMONE uni kerem to kʼalaluk lik ajvalilajuke. Skʼanoj li Jeovae xchiʼuk noxtok yakʼoj ta yoʼonton li mantal albil yuʼun stote. Lek ch-ilat yuʼun Jeova ti Salomone, jech oxal xi albat ta xvayich jun veltae: Salomón, ¿kʼusi cha kʼan ti cha kakʼbote?, x-utat.

Li Salomone xi la stakʼe: Jeova Dios kuʼun, li voʼone toj keremun to, jech oxal mu jnaʼ kʼuxi chi ajvalilaj. Jaʼ yuʼun akʼbun jpʼijil sventa xi tojob ta sventainel li alumale, xi.

Li Jeovae lek la jyaʼi li kʼusi la skʼan Salomone. Jaʼ yuʼun jech la jyalbe: Ta sventa ti la akʼanbun apʼijile, ti mu jaʼuk la akʼanbun ti jal cha kuxie mi jaʼuk ti ep akʼulejale, ta xkakʼbot mas apʼijil ti mukʼ buchʼu jech xkoʼolaj spʼijile. Pe jech noxtok, ta xkakʼbot li kʼusi muʼyuk la akʼanbune, ta melel, ta xkakʼbot akʼulejal xchiʼuk ichʼel ta mukʼ.

Ta tsʼakal, tal chaʼvoʼ antsetik ta stojolal Salomón ti tsots skʼopike. Li jun antse xi lik yale: Jun jnail xchiʼuk li ants liʼe, xi. Vokʼ jun jneneʼ, vaʼun echʼ chib kʼakʼal vokʼ sneneʼ li ants liʼ eke. Pe oy jun akʼobal li sneneʼe cham. Pe kʼalaluk yakal chi vaye, te ay yakʼ ta jxokon li sneneʼ ti chameme vaʼun jaʼ la jyikʼbun batel li jneneʼe. Kʼalal li julave, la jkil li neneʼ ti chamem xae, vaʼun la jkakʼ venta ti maʼuk li jneneʼe.

Kʼalal la jyaʼi jech li jun antse xi la jyale: ¡Mu jechuk! ¡Li neneʼ ti kuxule jaʼ kuʼun, yan li chameme jaʼ yuʼun li ants liʼe, xi. Xi la stakʼ li baʼyel antse: ¡Mu jechuk! ¡Li chameme jaʼ avuʼun yan li kuxule jaʼ kuʼun!, xi. Jaʼ jech la jyalilanbe sbaik li antsetike. ¿Kʼusi van tspas ti Salomone?

La skʼan jun espada, kʼalaluk ichʼbat tale, xi la jyale: Kuxul basik li neneʼe vaʼun juju kʼos xa vakʼbeik li antsetike, xi.

¡Moʼoj!, xi li smeʼ olole. Avokolikuk, mu xa milik li neneʼe. ¡Akʼbeik li jun ants liʼe!, xi. Pe li jun antse xi la jyale: Mu buchʼu xa vakʼbunkutik mi junukal; basik ta chaʼkʼos, xi.

Vaʼun xi la jyal li Salomone: ¡Mu xa milik li neneʼe! Jaʼ akʼbeik li baʼyel antse, yuʼun jaʼ ta melel smeʼ li olole, xi. Li Salomone la jyakʼ venta ti jaʼ ta melel smeʼ li olole, yuʼun sventa mu smilik li olole chaʼa la jyal ti jaʼ lek akʼo yakʼbeik li jun antse. Kʼalal la jyaʼiik krixchanoetik ti kʼux-elan la xchapan kʼop ti Salomone, xmuyubajik yuʼun toj lek pʼij li ajvalil yuʼunike.

Ti kʼu sjalil ajvalilaj li Salomone, li Diose la jyakʼbe bendision li jteklume, la jyakʼ ti akʼo lek yoxuk li balumile sventa chchʼi ep trigo, sevada, tsʼusubetik, ikuxetik xchiʼuk yantik veʼliletik. Lek skʼuʼ tslapik li krixchanoetike xchiʼuk lek snaik. Skotol oy yuʼunik li kʼusitik lekike.