Mwaha 63: Salomoni Mwene Aankhili
SALOMONI orii mwammiravo vaavo vanikhala awe mwene. Owo onnimphenta Yehova, nto onitthara miruku sooloka seiyo saavahiwa awe ni tiithi awe Davidi. Yehova onnihakalala ni Salomoni, siiso-nto ohiyu omosaa onnihimya moolohani wa Salomoni wira: ‘Salomoni, mumphavela wira koovaheeni exeeni?’
Mwa ela Salomoni onaakhula wira: ‘Yehova Muluku aka, nkirookhala mwammiravo ni nkinsuwela moota woolamulela. Siiso mukivahe ankhili wira kaalamuleleke atthu anyu mmukhalelo wooloka.’
Yehova onnihakalala ni yooveka ya Salomoni. Siiso Owo onihimya so: ‘Okhala wira nyuwo mukivekenle ankhili ohiya okumi woorakama aahiiso mihakhu, miyo kinrowa woovahani ankhili anceene onvikana mutthu ori otheene yoowo aatonko okhala. Masi kinrowa-tho woovahani ele ehivenka anyu, soopiili mihakhu ni ovuwa.’
Okathi vakhaani vattuli vaya athiyana anli annoorwa wa Salomoni ni mulattu muulupale. ‘Muthiyana ola ni miyo ninkhala empa emosaa,’ onnitthokiherya mmosaa a yaawo. ‘Miyo kaahimuyara mwaana mwaamulopwana, nto nuumala mahiku manli ala-tho yaahimuyara mwaana mwaamulopwana. Nto ohiyu omosaa mwanaya aahikhwa. Masi okathi waarupa aka, ala yaahimukuha mwanaya ookhwa vakhiviru va miyo nto khimukuxa mwanaka. Vaavo kaavennya aka vaarupa aka ni kinweha mwaana ookhwa, kaahisuwela wira ola kaahiyo awaka.’
Mwa ela muthiyana mukina onihimya so: ‘Nnaari! Mwanaka miyo tuula mukumi, nto ole ookhwa tawaya!’ Muthiyana oopacerya onaakhula wira: ‘Nnaari! Mwaana ookhwa taawinyu, nto ola mukumi tawaka!’ Ola ti moota waanyakulihana aya athiyana ale. Nto Salomoni onrowa opaka exeeni?
Owo oniitthaniha ekatana, nto, vaavo ela vaniruuhiwa aya, owo onihimya wira: ‘Mmukawanye mipantta miili mwaana owo mukumi, nto mmunnye kapantta khuta muthiyana.’
‘Nnaari!’ onnikhuwela inlaka maama awe eekeekhai. ‘Xontte muhimwiive mwaana ola. Mmunnye muthiyana ola!’ Masi muthiyana ole mukina onihimya wira: ‘Muhimunnye mutthu ori otheene a hiyo; haya mmukawanye mipantta miili.’
Wanikisa waya Salomoni onilavula so: ‘Muhimwiive mwaana owo! Mmunnye muthiyana oopacerya. Owo tthiri tori maama awe.’ Salomoni oosuwela ela okhala wira maama eekeekhai onnimphenta vanceene mwaana ole nto orii oophavela omunnya muthiyana mukina siiso owo khomphavela wira iiviwe. Vaavo atthu vaniiwa aya mmoota Salomoni saaphunka awe mulattu owo, awo annihakalala okhalana mwene aankhili ntoko owo.
Okathi wa olamulelo wa Salomoni, Muluku onnaareeliha atthu mu wiiriha etthaya oruwerya etrigu yinceene ni esevada, uuva ni efigu ni soolya sikina. Atthu aniwara ikuwo sooloka ni anikhala mu ipa sooloka. Vaakhala khuta etthu yooloka yinceene yoophiyerya wa khuta mutthu.
1 Mamwene 3:3-28; 5:9-14.
Makoho
- Exeeni Yehova enimukoha awe Salomoni, ni Salomoni onaakhula sai?
- Mwaha woosiveliwa ni yooveka ya Salomoni, etthu xeeni Yehova enimmanela awe natiri onvaha owo?
- Mulattu xeeni muulupale oniruuha aya axithiyana anli wa Salomoni?
- Ntoko siniwerya anyu woona valataratoni va, Salomoni oniphuka sai mwaha owo?
- Orii sai olamulelo wa Salomoni, nto nthowa xeeni?
Makoho oowuncererya
- Mmusome 1 Mamwene 3:3-28.
Etthu xeeni eniixutta aya alopwana anivahiwa miritti mmulokiheryoni mwa Muluku olelo mu masuu a vamurimani a Salomoni ari mu 1 Mamwene 3:7? (Sal 119:105; Mir 3:5, 6)
Moota xeeni yooveka ya Salomoni ery’aya ntakiheryo noolokexa na ovekela itthu sooreerela? (1 Mam 3:9, 11; Mir 30:8, 9; 1 Yoh 5:14-15)
Nroromelo xeeni mu othokorerya wa Salomoni mwaha wa athiyana ale anli ninnivaha aya sa olamulelo wa muhoolo a Salomoni Muulupale, Yesu Kristu? (1 Mam 3:28; Yes 9:5, 6; 11:2-4)
- Mmusome 1 Mamwene 5:10-14.
Moota xeeni Yehova saakhunlya awe mu yooveka ya Salomoni ya murima oowiiwelela? (1 Mam 5:10)
Moovarihana ni wiimananiha waapakiwe ni atthu mu owiriyana miruku sa Salomoni, tuuvi aatthuneya okhala muupuwelelo ahu sa osoma Masuu a Muluku? (1 Mam 5:10, 14; Yoh 17:3; 2 Tim 3:16)
