SOLOMONI akuŵa mwenye ali kamcanda. Jwalakwe akusamnonyela Yehofa, soni akukuya maloŵe gakamucisya gaŵamsalile baba ŵakwe Daudi. Yehofa akumnonyela Solomoni, m’yoyo cilo cine ŵamsalile mu sagamisi kuti: ‘Solomoni, ana mkusaka kuti nampe cici?’

Solomoni akwanga kuti: ‘Mlungu jwangu Yehofa, une ndili kamwanace, soni ngangumanyilila kulamulila. M’yoyo ambe lunda kuti ngombole kulamulila ŵandu ŵawo mwakuŵajilwa.’

Yehofa asangalele ni yaŵendile Solomoni. M’yoyo Yehofa akumsalila kuti: ‘Ligongo lyakuti m’ŵendile lunda ngaŵaga umi welewu kapena cipanje, une cinampe lunda lwejinji kupundana ni jwine jwalijose juŵatemi ni umi. Nambosoni cinampe yanganim’ŵenda, cipanje ni ucimbicimbi.’

Pali papite ndaŵi panandi acakongwe ŵaŵili akwisa kwa Solomoni ni ngani jakusawusya mnope. Jumo jwa acakongwewo akuŵeceta kuti: ‘Jwamkongweju ni une tukusatama m’nyumba jimo. Une naŵelece mwanace jwamlume, kaneko pali papite masiku gaŵili jwalakwe ŵaŵelecesoni mwanace jwamlume. Kaneko cilo cine mwanagwe ŵawile. Nambo panaliji mlugono, jwalakwe ŵajigele mwanace jwakwe jwam’we nikumleka ciŵandika une, jwalakwe nikujigala mwanangu. Panajimwice nikumlola mwanace jwam’we jula, nayiweni kuti nganaŵa jwangune.’

Jwamkongwe jwine jula akuŵeceta kuti: ‘Iyayi! Mwanace jwacijumiju ali jwangu, jwam’wejo ali jwa jwalakwejo!’ Jwamkongwe jwandanda kuŵeceta jula akwanga kuti: ‘Iyayi! Mwanace jwam’weju ali jwenu, nambo jwacijumiju ali jwangu!’ Mwelemu ni mwaŵatendelaga acakongweŵa pakukangana. Ana Solomoni ciŵatesile ni cici?

Jwalakwe akuŵilasya upanga, pawuyice upanga wula, jwalakwe akuŵeceta kuti: ‘Amkapanye mbali siŵili mwanace jwacijumiju, nikwagaŵanya acakongweŵa.’

Msyene jusyesyene jwa mwanace jula akugumila kuti:‘Iyayi! Conde akam’wulaga mwanacejo. Ampe mjangujo!’ Nambo jwamkongwe jwinejo akuŵeceta kuti: ‘Akampeleka kwa jwalijose jwetuwe, kwende agambe kumkatanya paŵili.’

Kumbesi kwakwe Solomoni akuŵeceta kuti: ‘Akam’wulaga mwanacejo! Ampelece kwa jwamkongwe jwandandajo. Jwalakwe ali msyene jusyesyene jwa mwanacejo.’ Solomoni akumanyilila yeleyi ligongo lyakuti msyene jusyesyene jwa mwanace akusamnonyela mwanagwe m’yoyo mpaka ŵakundile kuti mwanacejo ampelece kwa jwamkongwe jwinejo kuti mwanacejo akawa. Ŵandu papikene mwatendele Solomoni pakwelusya ngani jila, akusangalala ligongo lyakukola mwenye jwalunda mnope.

Mu ulamusi wa Solomoni, Mlungu akwapa majali ŵandu mwakutendekasya kuti litaka likole cajila ca tiligu, balele, mipeleya ni mikuju, soni yakulya yine. Ŵandu akuwala yakusalala, soni akutama m’nyumba syambone. Jwalijose akwete yindu yejinji yambone.