LOKO David ma gbo ɔ, e ngɔ Yehowa sɔlemi we ɔ he foni nɛ Mawu ngɔ ha lɛ ɔ kɛ ha Salomo. Salomo je sɔlemi we ɔ mami sisi ngɛ e nɔyemi jeha eywiɛne ɔ nɔ, nɛ e ngɔ jeha kpaago kɛ fã kɛ gbe nya. Nyumuhi akpe nyɔngmahi abɔ tsu ní kɛ ma sɔlemi we ɔ, nɛ tsu ɔ mami hu ngɔ sika fuu. Ejakaa, a ngɔ sika tsu kɛ sika hiɔ fuu kɛ ma sɔlemi we ɔ.

Sɔlemi we ɔ hɛɛ tsuhi pɔtɛɛ enyɔ, kaa kpe he bo tsu ɔ. Se tsu nɛ ɔmɛ kle pe tsuhi nɛ a ngɛ kpe he bo tsu ɔ mi ɔ si enyɔ. Salomo ha nɛ a ngɔ somi daka a kɛ ma se tsu ɔ mi, nɛ a ngɔ ní kpahi hu nɛ́ ngɛ kpe he bo tsu ɔ mi ɔ kɛ to tsu kpa a mi.

Benɛ a gbe sɔlemi we ɔ mami nya a, a ngmɛ okplɔɔ nguaa ko. Salomo kpla si ngɛ sɔlemi we ɔ hɛ mi nɛ e sɔle, kaa bɔnɛ o na ngɛ foni ɔ mi ɔ. Salomo de Yehowa ke: ‘Hiɔwe tete po kpi mo, lɛɛ kɛ e maa pee kɛɛ nɛ sɔlemi we nɛ ɔ maa kpe mo. Se, ye Mawu, i kpa mo pɛɛ, ke o ma a plɛ a hɛ mi kɛ tsɔɔ hiɛ ɔ nɛ a sɔle ɔ, bu mɛ tue.’

Benɛ Salomo sɔle ta a, la je hiɔwe kɛ ba sa lohwe ɔmɛ nɛ a kɛ maa sa afɔle ɔ ngɛ afɔle sami latɛ ɔ nɔ. Kɛkɛ nɛ la ko nɛ ngɛ kpɛe je Yehowa ngɔ ba hyi sɔlemi we ɔ. Enɛ ɔ tsɔɔ kaa Yehowa ngɛ tue bue, nɛ e bua jɔ sɔlemi we ɔ kɛ Salomo sɔlemi ɔ hu he. Amlɔ nɛ ɔ, sɔlemi we ɔ ba da kpe he bo tsu ɔ nane mi, kaa he nɛ mabi ɔmɛ ma ja ngɛ.

Salomo ngɔ ní lemi kɛ ye mabi ɔmɛ a nɔ be kɛkɛɛ, nɛ a ná bua jɔmi. Se Salomo ya ngɔ ma se yihi fuu nɛ́ a ja we Yehowa. Anɛ o na a ti nɔ kake nɛ ngɛ amaga jae ngɛ foni ɔ mi lo? Nyagbe ɔ, Salomo yi ɔmɛ ha nɛ lɛ hu e ba bɔni amaga jami. Anɛ o le nɔ́ nɛ ba benɛ Salomo bɔni enɛ ɔ peemi ɔ lo? E nɛ́ mabi ɔmɛ mɔbɔ hu. E plɛ yiwutsotsɛ, nɛ mabi ɔmɛ a bua jɔɛ hu.

Enɛ ɔ ha Yehowa mi mi fu Salomo, nɛ e de lɛ ke: ‘Ma kpɔ matsɛ yemi ɔ ngɛ o dɛ nɛ ma ngɔ kɛ ha nɔ kpa. I be pee ngɛ o yinɔ, se ma pee benɛ o bi ngɛ nɔ yee. Se i be matsɛ yemi ɔ sisi bi ɔmɛ tsuo ngɔe kɛ je o bi ɔ dɛ.’ Ha nɛ waa hyɛ bɔnɛ enɛ ɔ ba ha.