ILYO Davidi talafwa, aebele Solomone ifyo Lesa alefwaya itempele lyakwe ukuba. Mu mwaka walenga 4 mu kuteka kwakwe, Solomone atampile ukukuula itempele, kabili balikuulile mu myaka 7 na hafu. Abaume abalekuula itempele bali abengi sana, kabili pa kukuula lilya itempele balibomfeshe indalama ishingi. Ne calengele, ni co balibomfeshe golde na silfere iingi.

Itempele lyakwete imiputule ibili, nga filya fine icikuulwa ca kupepelamo cali. Lelo imiputule ya mwi tempele yali iikalamba sana ukucila iya mu cikuulwa ca kupepelamo. Solomone abuulile icipao ca cipangano no kucibika mu muputule wa mu kati uwa mwi tempele, e lyo ifintu fimbi ifyo basungiile mu cikuulwa ca kupepelamo bafibikile mu muputule umbi.

Ilyo itempele lyapwile, kwali ukusefya ukukalamba. Solomone afukeme pa ntanshi ye tempele no kupepa nga fintu ulemona pa cikope. Aebele Yehova ati: ‘Apo umuulu onse te kuti umukumane, bushe muli ili itempele e mo mwingekala? Lelo mwe Lesa wandi, mulekutika ku bantu benu ilyo bapepa kuli imwe pali ici cifulo.’

Ilyo Solomone apwishishe ukupepa, umulilo walifumine ku muulu. Waocele inama shonse isho bapeele kuli Lesa. Na mwi tempele mwaishileba ulubuuto ulukalamba ukufuma kuli Yehova. Ici calangile fye ukuti Yehova alyumfwile ipepo kabili alitemenwe ilyo itempele lyakuulilwe na lintu Solomone apepele kuli ena. Balilekele ukupepela mu cikuulwa ca kupepelamo, batampile ukupepela mwi tempele.

Solomone alitekele bwino abantu pa nshita iitali, kabili abantu balitemenwe. Lelo pa numa, Solomone aupile abanakashi abengi abashalepepa Yehova, abafumine mu fyalo fimbi. Umo pa banakashi Solomone aupile, e uyu alepepa lesa wa bufi. Abakashi ba kwa Solomone basukile balenga Solomone na o atendeka ukupepa balesa ba bufi. Bushe nawishiba icacitike ilyo Solomone atendeke ukupepa balesa ba bufi? Alilekele ukuteka bwino abantu. Atendeke ukubacusha, na bantu batampile ukuba no bulanda.

Ifyo Solomone alecita fyalekalifya Yehova. E ico Yehova amwebele ati: ‘Nkakupoka ubufumu no kupeela umbi. Nshakacite ici ilyo ucili no mweo, nkakupoka ubufumu ilyo umwana obe akalateka. Lelo nshakamupoke abantu bonse aba mu bufumu bwakwe.’ Natumone ifyo cali.