Maana 64nan

Solomani ye Alabatosoba jɔ

JEHOVA ka kan ka bato so min kɔnɔ, Jehova yɛrɛ tun ye o jɔcogo jira Dawuda la. O la sa, sani Dawuda ka sa, a tun ye o so jɔcogo jira Solomani na. Solomani ye Alabatosoba jɔli daminɛ a ka masaya san naaninan na. Alabatoso jɔli banna ka bɛn san wolonwula ni tila ma. Mɔgɔ minnu ye a baara kɛ, olu tun ka ca ni mɔgɔ ba tan caman-caman ye. Wari camanba bɔra bawo sanu ni warijɛ camanba de donna Alabatoso jɔli la.

Soden fila tun b’a kɔnɔ, i n’a fɔ soden fila tun bɛ finiso kɔnɔ cogo min na. Nka a sodenw kɔnɔ tun  ka bon ka tɛmɛ finiso sodenw kɔnɔ kan siɲɛ fila. Soden min bɛ so ɲɛkɔnɔna na, Solomani ye layidu wagande bila o kɔnɔ, ka finiso kɔnɔfɛn tɔw bila soden tɔ kelen kɔnɔ.

Alabatosoba jɔli banna tuma min na, ɲɛnajɛba kɛra. Solomani ye a ɲɔngiri Alabatosoba ɲɛfɛ ka Ala deli, i n’a fɔ i ɲɛ b’a la cogo min na ja kan. Solomani ko: ‘I tɛ kun sankolo bɛɛ lajɛlen kɔnɔ, kuma tɛ nin Alabatosoba ma, ne ye min jɔ. Nka, ne ka Ala, i ka sabali ka i ka jama lamɛn tuma min na a bɛna a ɲɛsin nin yɔrɔ ma ka i deli.’

Solomani tilala delili la tuma min na, tasuma jiginna ka bɔ sankolo la ka baganw bɛɛ jeni minnu tun fagara ka kɛ sarakaw ye. Yeelenba fana bɔra Jehova yɔrɔ ka Alabatosoba kɔnɔna bɛɛ fa. O kow y’a jira ko Jehova tun bɛ ka Solomani lamɛn, ani ko Alabatosoba ani Solomani ka delili diyara a ye. Finiso tun tɛ batokɛyɔrɔ ye bilen. Mɔgɔw tun bɛ na Jehova bato sisan Alabatosoba de kɔnɔ.

Waati jan kɔnɔ, Solomani ye mɔgɔw mara ni hakilitigiya ye. O la sa, jamana kɔnɔmɔgɔw tun bɛ hɛrɛ la. Nka, Solomani ye muso caman furu minnu tun bɛ bɔ jamana wɛrɛw la. U tun tɛ Jehova bato. I ɲɛ bɛ a muso dɔ la bolibato la yan yɔrɔ la wa? A laban na, Solomani musow y’a bila a ka boliw fana bato. Solomani ye o kɛ tuma min na, i b’a dɔn min kɛra wa? A tun tɛ mɔgɔw minɛ ka ɲɛ tuguni. A juguyara u ma kosɛbɛ. Mɔgɔw tun tɛ hɛrɛ la tun.

O kow y’a to Jehova diminna Solomani kɔrɔ. A y’a fɔ Solomani ye ko: ‘Ne bɛna masaya bɔsi i la ka o di mɔgɔ wɛrɛ ma. Nka ne tɛna o kɛ i yɛrɛ tile la. Ne bɛna o kɛ i denkɛ ka mara kɔnɔna na. Ne tɛna jamana bɛɛ minɛ i denkɛ la.’ An k’a lajɛ o kɛra cogo min na.

1 Tilew Kibaru 28:​9-21; 29:​1-9; 1 Masakɛw 5:​1-18; 2 Tilew Kibaru 6:​12-42; 7:​1-5; 1 Masakɛw 11:​9-13.