Una pa mamatay si David, gihatag niya kang Solomon ang mga plano gikan sa Diyos sa pagtukod sa templo ni Jehova. Misugod si Solomon sa pagtukod sa templo sa ikaupat nga tuig sa iyang pagmando. Migugol pito ug tunga ka tuig sa paghuman niini. Usa ka dakong trabaho ang nahimo ug daghang salapi ang naggasto!

Ang templo adunay duha ka pangunang mga lawak, sama sa tabernakulo. Apan kining mga lawaka doble ang gidak-on niadtong sa tabernakulo. Ang arka sa tugon ug ang ubang mga butang nga anaa sa tabernakulo gibutang sa templo.

Sa nahuman ang templo, gihimo ang usa ka dakong selebrasyon. Si Solomon miluhod atubangan sa templo ug nag-ampo, ingon sa imong makita sa hulagway. ‘Ako nahibalo nga kining temploha maoy gamay ra kaayo sa paghupot kanimo,’ nagkanayon si Solomon ngadto kang Jehova, ‘Apan, O akong Diyos, palihog pamati sa imong katawhan kon sila mag-ampo ning dapita.’

Sa nakahuman si Solomon sa pag-ampo, ang kalayo nahulog gikan sa langit ug nagsunog sa gihalad nga mga mananap. Ang usa ka masanag nga kahayag nagpuno sa templo. Kini pagpakita nga si Jehova namati, ug nga siya nahimuot sa templo ug sa pag-ampo ni Solomon. Ang templo inay kay sa tabernakulo, karon nahimong ang dapit diin ang katawhan moanha sa pagsimba sa Diyos.

Sulod sa taas panahon si Solomon nagmando sa usa ka maalamong paagi. Apan siya nangasawa sa daghang mga babaye gikan sa ubang mga nasod nga wala magsimba kang Jehova. Nakita mo ba ang usa kanila nga nagsimba atubangan sa usa ka idolo? Sa kataposan ang iyang mga asawa nakakabig kang Solomon sa pagsimba sa ubang mga diyos. Unya nahimo siyang mapintas ug ang katawhan wala na magmalipayon.

Si Jehova nasuko niini. Gisultihan niya si Solomon nga sulod sa pagmando sa iyang anak lalaki, iyang kuhaon ang gingharian ug ihatag kini sa laing tawo. Apan dili niya kuhaon ang tanang katawhan sa gingharian gikan sa iyang anak lalaki. Tan-awon ta sa unsang paagi kini nahitabo.