MUZE te Ndawichi kanda achifwa, iye yahana kuli Solomone chilweza cha Zambi cha utungilo wa tembele ya Yehova. Ha mwaka wa muchiwana wa kuyula chenyi, Solomone yaputuka kutunga tembele, utungilo wacho unakalinga miaka shimbiali ni chipinji mba yiyihwa. Makumi a tununu a malunga anakakalakala ha utungilo wa tembele yacho, nawa utungilo wacho unakafika mbongo jinji. Mumu oru ni prata yinji anakakalakala nayo.

Tembele yacho te yikwete yipatulo yaali, ngwe chizechene mwapwile mu tabernakulu. Alioze yipatulo yino te yili yinene kaali keswe kuhianyisa yize te ya mu tabernakulu. Solomone yatuma kusa mushete wa usendo muchima lia chipatulo cha tembele, nawa ni yuma yikwo yize te yatwama mu tabernakulu yayisa mu chipatulo chikwo.

Muze utungilo wa tembele te hiwahwa, yikupwa chimwe chiwanyino chinene. Solomone yaliumba hashi mu tembele yalemba, ngwe chize yena muhasa kumona ha chizulie chino. Salomone yamba kuli Yehova ngwenyi: ‘Lilu lia malilu kuliakutele, mba kuchi tembele yino muyikutela. Alioze, Zambi yami, ngunaliumbu, panjika kama atu je muze malemba ha chihela chino.’

Muze Solomone te hahwisa kulemba, yikwiza kahia mu malilu. Yikocha yimuna yeswe yize asele ya mulambu. Nawa tembele yeswe yitemuka ni pangu lia Yehova. Yino yisolola ngwo Yehova te kanevu ko, nawa ngwo iye kawahilila chinji ni tembele hamwe ni kulemba cha Solomone. Mba hi tembele, yisalakana tabernakulu hanga atu apwe ni kuwayila mo.

Solomone kanakayula ni mana ha miaka yinji, atu te kakuwahilila chinji. Alioze Solomone yambata mapwo anji a ku yifuchi yeka waze te keshi kuwayila Yehova. Yena muhasa kumona umwe wa kuli ayo ha chizulie chino kanawayila kulutwe lia umwe kaponya? Chocho mapwo jacho yapiangula Solomone hanga ni neye awayile tuzambi jacho. Yena unanyingika yika yize yapwileko muze Solomone alingile chocho? Solomone te keshi kufunga nawa atu ni umbovu. Iye yapwa ni yitanga yipi, kashika atu te keshi nawa ni uwahililo.

Yehova yevwila Solomone uli unji, kashika iye yamwamba ngwenyi: ‘Yami mungukuchiza wanangana munguuhana kuli lunga wakacheka. Yami chichikuchilinga ha mashimbu a mwono we, alioze ha mashimbu a kuyula cha mwane. Alioze yami chichikwanda atu eswe mu wanangana wa mwane.’ Tutalenu chize yino yinapwa.