Sliman yebna lemqam
TAQSIṬ TIS 64
Sliman yebna lemqam
UQBEL ad yemmet, Dawed imudd i Sliman ţfaṣil i s-d-ifka Ṛebbi i lebni n lemqam n Yahwa. Deg useggas wis ṛebɛa n leḥkem-is, Sliman yebda lebni n lemqam. Yekka sebɛa iseggasen d nnefṣ d wamek i t-ifukk. Ţ-ţiɛceṛtin n luluf ixeddamen i gebnan lemqam. Lebni-yagi yusa-yasen-d ɣlay axaṭer ssexdmen aṭas aṭas n ddheb d lfeṭṭa.
Llant snat n texxamin zdaxel n lemqam am uqiḍun imqeddes. Lameɛna ugarent meṛtayen tixxamin-nni yellan deg uqiḍun. Sliman yumeṛ ad rren asenduq n leɛqed ɣer texxamt taqernit, ma d dduzan meṛṛa nniḍen yellan deg uqiḍun imqeddes a ten-rren ɣer texxamt-nni nniḍen.
Mi kfan lebni n lemqam, xedmen tameɣra tameqrant. Sliman yeɣli ɣef tgecrar, yeẓẓull Yahwa zdat n lemqam akken i teţwaliḍ di ţţeswiṛa-ya. Yenna i Yahwa: ‘Atnan igenwan akk-d igenni n igenwan ur k-wwin ara, a xelliɛad lemqam-agi i k-bniɣ. Acu kan a Sidi Ṛebbi, ḥess-ed i wegdud-ik m’ara yeẓẓall ɣer lǧiha n wemkan-agi.’
Mi gfukk Sliman taẓallit-is, teɣli-d tmes seg igenni, dɣa tečča lmal meṛṛa yeţţunefken d asfel. Tecceɛceɛ-ed diɣen tafat iǧehden di lemqam i d-yekkan sɣur Yahwa. Annect-a isbeggen-ed belli iḥess-ed Yahwa yerna lemqam ţ-ţẓallit n Sliman ɛeǧben-as. Tura, di lemqam i glaq ad yeɛbed wegdud mačči deg uqiḍun imqeddes.
Acḥal d aseggas, Sliman iḥkem s lekyasa yerna yewwi-d sseɛd i wegdud. Lameɛna yuɣal yezweǧ neţţa d waṭas n tlawin tibeṛṛaniyin ur neţɛebbid ara Yahwa. Twalaḍ yiwet seg-sent iţɛebbiden lmeṣnuɛ? Ɣer taggara, tilawin-agi wwint Sliman ad yeɛdeb ula d neţţa iṛebbiten nniḍen. Teẓriḍ acu yeḍran mi gexdem annect-agi Sliman? Tṛuḥ-as leḥnana-nni yesɛa zik ɣer wegdud. Ihi, yesseṛwa lḥif i wat Isṛayil armi i d-yeɣli leḥzen fell-asen.
Ayen akka yexdem Sliman yesserfa Yahwa, dɣa yenna-yas: ‘A k-kkseɣ tagelda, a ţ-fkeɣ i wayeḍ. Acu kan, mačči skud akka teddreḍ ara xedmeɣ ayagi, lameɛna m’ara yuɣal mmi-k d agellid. Lameɛna ur ţekkseɣ ara i mmi-k lqum meṛṛa n tgelda.’ A nwali tura acu yeḍran.
1 Amezruy 28:9-21; 29:1-9; 1 Igelliden 5:1-18; 2 Amezruy 6:12-42; 7:1-5; 1 Igelliden 11:9-13.
