МЫЛІЭ щІыкІэ Даут Сэлмэн иритыжащ Алыхьым къритауэ иІа унэшхуэр зэрыухуэн хуейм и щІыкІэр. Зэрыпащтыхьрэ илъэс еплІанэм щыхэІэбам, Сэлмэн унэшхуэр ищІыну хуожьэри илъэсиблрэ ныкъуэрэ дэкІа нэужь еух. Абы и щІыным цІыху минипщІ зыбжанэ пэрытщ икІи ахъшэшхуэ куэд токІуадэ. Апхуэдиз абы щІытекІуадэр дыщэ куэдрэ дыжьын куэдрэ ехьри аращ.

Алыхьым и унэшхуэри, шатарым ещхьу, мыхьэнэ иІэу пэш кІуэцІитІ хъут. Ауэ а пэшхэр шэтырым и пэшхэм нэхърэ тІукІэ нэхъ инт. АдэкІэ нэхъ къыщыт пэш кІуэцІым Сэлмэн щІегъэувэ зэгурыІуэныгъэм и пхъуантэр, мыдрейм – апщІондэху шатырым щІэта адрей хьэпщыпхэр псори.

Алыхьым и унэшхуэр щІын зэраухам теухуауэ махуэшхуэ ящІыж. Еплъыт сурэтым: Сэлмэн унэшхуэм и пащхьэ лъэгуажьэмыщхьэу щоуври Алыхьым йолъэІу. «Мо уэгур зиинагъым имыхуэ уэркІэ сыту цІыкІунитІэІуэ–тІэ мы унэр. Си Тхьэ, сынолъэІу, мы лъэныкъуэмкІэ зыкъагъазэу уи цІыхухэр къыщолъэІукІэ, зэхэпхыну».

Сэлмэн тхьэлъэІур щиухым, уафэм мафІэ къохри къурмэну ягъэхьэзыра Іэщхэр къещтэ. Унэшхуэр Иеговэ къыбгъэдэкІ нурым нэхубзэу къегъэнэху. АбыкІэ гурыІуэгъуэт Иеговэ тхьэлъэІур зэрызэхихар икІи Сэлмэн и унэшхуэмкІи и тхьэлъэІумкІи зэрыарэзыр. Иджы Алыхьым щІыхь хуащІыну цІыхухэр здэкІуэр шатырыракъым, атІэ унэшхуэращ.

Илъэс куэдым и кІуэцІкІэ Сэлмэн Іущагъ бгъэдэлъу и къулыкъур егъэзэщІэри цІыхухэри насыпыфІэщ. Ауэ иужькІэ Сэлмэн Иеговэ хуэмылажьэ хамэ щІыналъэ щыщ фыз куэд къешэ. Плъагъурэ абы щыщ зым тхьэнапэр зэригъэлъапІэр? ИкІэм–икІэжым а цІыхубзхэм Сэлмэни дашэх а хамэ щІыналъэм щыщхэм я тхьэм хуэлэжьэну. ПщІэрэ абы иужькІэ къэхъур сытми? Сэлмэн пащтыхьыфІу щытыжкъым. Ар гущІэгъуншэ мэхъу икІи цІыхухэр абы насыпыншэ ирохъу.

Абы щхьэкІэ Иеговэ Сэлмэн къигъэгубжьати жреІэ: «Уи пащтыхьыгъуэр къыптесхыжынурэ нэгъуэщІым естынущ. Упсэууэ ар сщІэнукъым, щысщІэнур уи къуэм и тепщэгъуэ зэманым дежщ. Ауэ уи къуэми и пащтыхьыгъуэм щыпсэу цІыху псори къытесхыжынукъым». ИІэт къэтщІэнти ар зэригъэзэщІар дауэми.