DAVIDA saka akyangye kufwa, wabujile mwananji Solomone byamwambijile Lesa pa mambo a kushimika nzubo ya Yehoba. Mu mwaka wa buna wa bukalama bwanji, Solomone watendekele kushimika nzubo ya Lesa kabiji papichile myaka itanu na ibiji ne kichika pa kuba’mba ipwe. Bantu bashimikilenga nzubo ya Lesa bavujile bingi kabiji pa ino nzubo pataiwe mali avula bingi mambo a kuba ngolode ne siliva yavula yaingijishiwe bingi.

Nzubo ya Lesa yajinga na bibamba bikatampe bibiji byonka byajinga tente wa lusambakeno. Pano bino bibamba byakijilemo kubaya kukila byobya byajinga mu tente wa lusambakeno. Solomone wabikile jikwachi ja lulayañano mukachi ka kibamba kya nzubo ya Lesa, ne bintu bikwabo byajinga mu tente wa lusambakeno wibibikile mu kibamba kikwabo.

Nzubo ya Lesa byo yapwile kushimikwa, kwajinga kusekelela kukatampe bingi. Solomone wafukamine kulutwe ya nzubo ya Lesa ne kulomba, byonka byo wamona pa kipikichala. Solomone walombele kwi Yehoba amba: ‘Mwiulu mwine mwimukepela, anweba kechi mwafikamo ne; nanchi mufikemo byepi mu ino nzubo yo nemushimikila! Bino, anweba Lesa wami, namba mukomvwe lulombelo lo nkalombanga amiwa kalume wenu saka ntala kuno kuntu.’

Kabiji Solomone byo apwishishe kulomba, mujilo waikijile kufuma mwiulu. Uno mujilo wasokele bitapisho bya banyama byo banengezhezhe. Ponkapo kyeya kikatampe kyafumine kwi Yehoba ne kukumbana mu nzubo yanji. Kino kimwesha’mba Yehoba watelekelenga kabiji watokeshiwe ku muchima na mambo a nzubo ya Lesa ne lulombelo lwa kwa Solomone. Mu kifulo kya tente wa lusambakeno, nzubo ya Lesa pano yo yaikele ke mpunzha ko baiyanga bantu na kupopwela.

Pa myaka yavula, Solomone walamine bantu na maana kabiji basekelejile bingi. Bino Solomone waishile kusongola banabakazhi bavula bingi kufuma mu byalo bikwabo babulanga kupopwela Yehoba. Nanchi wamumona mwanamukazhi umo ubena kupopwela kilubi nyi? Kyapeleleko, bakazhi banji Solomone bamulengejile naye kutendeka kupopwela balesa bangi. Abya mwayuka kyamwekele kimye Solomone kyo atendekele kuba kino nyi? Walekele kulama bantu bulongo. Waikele wakanama kabiji bantu kechi batwajijile kwikala balusekelo ne.

Kino kyalengejile Yehoba kumuzhingijila Solomone kabiji wamwambijile’mba: ‘Nkakwangata bufumu ne kwibupana ku muntu mukwabo. Kechi nkoba kino mu moba obe ne, bino nkebwangata mu moba a mwanobe. Bino nangwa byonkabyo, kechi nkangata bantu bonse ba bufumu ku mwanobe ne. Twaya tumone kino byo kyaubiwe.