Esimwititi 64: Saromo ta tungu ntembeli
KOMEHO Ndafita a ka fe, age kwa pere Saromo mafaneko aga ga tundire kwaKarunga gokutungisa ntembeli zaJehova. Momvhura zaune zepangero lyendi, Saromo ta tameke kutunga ntembeli, ano azo tazi gusa nomvhura ntambali noukahe mokuzimana. Vagara mayovi nomurongo tava rugana kontembeli, ano etungo tali pura yimaliva yoyinzi unene. Eyi tayi kara ngoso morwa metungo kwa ruganesa mo sisiliveli nongorodo zonzi.
Ntembeli kwa kara nononkondwa dononene mbali, ngomu tupu za kere nkongoronzugo. Nye unene wononkondwa edi kwa pitakana pwaruvali meyereko nedi domonkongoronzugo. Saromo ta ninki asi va ture sikesa segwanekero monkondwa zomonda montembeli, ano yininke yapeke eyi ya kere monkongoronzugo monkondwa nazopeke.
Ntembeli apa zina pu, tapa kara ebodjano lyenene. Saromo ta tongamene komeho zontembeli nokukanderera, ngomu ono kuyimona mefano. Saromo ta tantere Jehova asi: ‘Nampili meguru moomu kapi o gwaneke mo, ngapi tupu nye omu no pira kugwaneka montembeli ezi na tunga. Nye Karunga gwange, ngo purakene kovantu woge nsene tava kanderere kuvyuka kevango eli.’
Apa ana mana Saromo kukanderera, mundiro tagu tundu meguru. Tagu hwike nonzambo doyikorama edi va ninkire. Ano uzera wokunteinta wokutunda kwaJehova tau zwida ntembeli. Eyi kuna kulikida asi Jehova kuna kupurakena, ntani age ana hafere ntembeli ntani nekanderero lyaSaromo. Vantu kapi tava zi hena konkongoronzugo va ka kanderere, nye tava wiza kontembeli.
Saromo ta pangere moukonentu siruwo sosire, ano vantu kwa hefe. Nye Saromo ta kwara vakadi wovanzi wovanayirongo ava ngava pili kukarera Jehova. To mono gumwe gwawo ogu ana kukarera sikarunga sefano? Mouhura vakadi vendi tava ninki Saromo nage a ka kerere vakarunga peke. Ono diva asi yinke yina horoka apa Saromo ana rugana eyi? Age kapi ana kutekura hena vantu nawa. Age ta kara gonyanya, ano vantu kapi hena vana hafa.
Eyi tayi handukisa Jehova makura ta tantere Saromo asi: ‘Tani ku gusa uhompa ni u pe nagepeke. Kapi ngani yi rugana pomazuva goge, nye papa nga pangera munoge. Nye kapi ngani gusa vantu womouhompa navenye kwa munoge.’ Tu tareni asi ngapi omu ya horokere eyi.
1 Histoli 28:9-21; 29:1-9; 1 Vahompa 5:1-18; 2 Histoli 6:12-42; 7:1-5; 1 Vahompa 11:9-13.
Mapuro
- Nomvhura dingapi nali mu gusa Saromo mokumana etungo lyontembeli zaJehova, ntani morwasinke nali pulira yimaliwa yoyinzi?
- Nonkondwa dononene dingapi da kara montembeli, ntani yinke ava tura mo monkondwa zomonda?
- Yinke ana kuuyunga Saromo mekanderero lyendi apa zina pu ntembeli?
- Ngapi omu ana likida Jehova asi ana hafere ekanderero lyaSaromo?
- Vakadi vaSaromo, yinke va mu ninkisire a rugane, ntani yinke ya horoka kwaSaromo?
- Morwasinke Jehova ana handukilire Saromo, ntani yinke ana mu tantere Jehova?
Mapuro gokugwederera ko
- Resa 1 Histoli 28:9, 10.
Mokutara kononkango daNdafita edi va tjanga mo-1 Histoli 28:9, 10, yisinke twa hepa kukondja kurugana meparu lyetu nkenye apa?
- Resa 2 Histoli 6:12-21, 32-42.
Ngapi omu ga likidire Saromo asi kwato nzugo ezi ga tunga muntu na vhura kugwaneka Karunga gekEguru-guru?
Nonkango daSaromo domo-2 Histoli 6:32, 33, yinke adi likida kuhamena Jehova?
- Resa 2 Histoli 7:1-5.
Moomu tupu Vaisraeli ya va tumangedere mokugava ehamberero kwaJehova pokumona uyerere wendi, ngapi nayi tu kundama naina apa atu gazadara matungiko gaJehova kovantu vendi?
- Resa 1 Vahompa 11:9-13.
Ngapi omu eparu lyaSaromo lya likida mulyo gokukara mulimburukwi dogoro kouhura?
