TEJ naʼmxteq tkyim David xi tqʼoʼn uʼj te Salomón aju jatumel tkuʼx tilbʼilal ja te nabʼl Dios. Toj tkyajen abʼqʼi toklen Salomón te ajkawil, ok ten bʼinchal ja te nabʼil Dios, wuq tukʼe mij (nikʼjan) abʼqʼi xi tiʼn tuʼn tbʼaj tbʼinchet ja lu. Nimxix xjal e aqʼunan tuʼn tjaw bʼinchet, ax ikx nim pwaq xi tiʼn tuʼnju ajbʼen nim qʼan pwaq ex nim saq pwaq tiʼj.

Attoq kabʼe kwart nim kyoklen tuj ja te nabʼil Dios, ik tzeʼnj attoq toj ja xbʼalin. Kabʼe maj mas nimaq qe kwart lu twitzjo atqeʼtoq toj ja xbʼalun. Okx tqʼoʼn Salomón kajon kʼubʼil yol kyaj bʼant tiʼj tuj kwart aju tokx tzmax t-xe ja te nabʼl Dios.

Ok jun ninqʼij tej tbʼaj bʼinchen ja te nabʼil Dios. Kubʼ mejeʼ Salomón twitz ja te nabʼil Dios, ik tzeʼnj tkuʼx toj tilbʼilal, ex xi tqʼamaʼn te Jehová: ‹Mintiʼpe in kanun kyaʼj maʼxix (niminxix) wen tuʼn ttena tuj, yejtzulo te ja lu aju ma jaw nbʼinchaʼne. Aya nman Dios, bʼintz qeye aj Israel aj kynaʼn Dios oj ttzaj kykeʼyin ja lu›.

Tej tbʼaj naʼn Salomón Dios, kuʼtz qʼaqʼ toj kyaʼj. E kubʼ tzʼeʼy, mo e kubʼ patj, oyaj tuʼn. Ex kubʼ noj tuj ja tuʼn tspikʼumal Jehová. A jlu tzaj tyekʼin qa nbʼintoq Jehová tiʼj tnaʼj Dios Salomón ex qa ntzalajteq tiʼjju ja. Atztl toj ja lu e ul qe xjal kʼulil, ex nya atztl tuj ja xbʼalun.

Nim ambʼil kawin Salomón tukʼe tnabʼil, e tzalaj xjal toj ambʼil aju. Naqtzun tuʼnj kubʼ mujeʼ Salomón kyukʼe nim xuʼj te junjuntl tnam aqejo mitiʼtaq nche ajbʼen te Jehová. ¿Ntila, mo ntlome, jun t-xuʼjel lu in najbʼen te tdios? Bʼant-x tuʼn tkʼulin Salomón kyuʼn xuʼj lu kywitz junjuntl Dios. ¿O tbʼiye tiʼ tzaj? Mya bʼaʼn okatl tmod Salomón, ex mitiʼtl e tzalaj xjal tjaqʼ tkawbʼil.

Tzaj tqʼoj Jehová tiʼj Salomón tuʼn jlu ex tzaj tqʼamaʼn te kyjaʼ: ‹Kʼelel wiʼne kawbʼil tuj tqʼabʼa ex kxel nqʼoʼne te juntl. Mlay nbʼinchaye jlu akux itzʼxa; tzmaxi kʼelel wiʼne aj tok tkʼwala te kawil. Naqtzen aju mlay tzʼel wiʼne tkyaqil xjal tjaqʼ tkawbʼil tkyʼajala›. Ok kʼelel qnikʼ tiʼj tiʼ bʼaj.