STORJA 64
Salamun Jibni t-Tempju
QABEL miet, David ta lil Salamun il-pjanijiet minn Alla biex jibni t-tempju taʼ Ġeħova. Fir-rabaʼ sena tal-ħakma tiegħu, Salamun jibda jibni t-tempju, u jieħu sebaʼ snin u nofs biex jitlesta. Għaxriet t’eluf taʼ rġiel jaħdmu fuq it-tempju, u l-bini jiswa ħafna u ħafna flus. Dan għax jintuża ħafna deheb u fidda fil-bini.
It-tempju għandu żewġ kmamar prinċipali, l-istess kif kellu t-tabernaklu. Imma dawn il-kmamar huma d-doppju taʼ dawk tat-tabernaklu. Salamun ipoġġi l-arka tal-patt fil-kamra taʼ ġewwa tat-tempju, u l-affarijiet l-oħrajn li kienu jinżammu fit-tabernaklu tpoġġew fil-kamra l-oħra.
Meta t-tempju jitlesta, issir festa kbira. Salamun jinżel għarkopptejh quddiem it-tempju u jitlob, bħalma tistaʼ tara fl-istampa. ‘Lanqas is-sema kollu mhu kbir biżżejjed biex jesgħek,’ jgħid Salamun lil Ġeħova, ‘mela kemm inqas ma jistaʼ jesgħek dan it-tempju. Imma, O Alla tiegħi, jekk jogħġbok, ismaʼ lill-poplu tiegħek meta jitolbu lejn dan il-post.’
Meta Salamun ilesti t-talba tiegħu, jinżel nar mis-sema. Jaħraq is-sagrifiċċji li saru tal-annimali. U dawl jiddi mingħand Ġeħova jimla t-tempju. Dan juri li Ġeħova qed jismaʼ, u li hu ferħan bit-tempju u t-talba taʼ Salamun. It-tempju, minflok it-tabernaklu, issa jsir il-post fejn in-nies jiġu biex jagħtu qima.
Għal żmien twil Salamun jaħkem b’mod għaqli, u n-nies huma ferħanin. Imma Salamun jiżżewweġ ħafna nisa minn pajjiżi oħrajn li ma jqimux lil Ġeħova. Tistaʼ taraha lil waħda minnhom tagħti qima quddiem l-istatwa? Fl-aħħar in-nisa taʼ Salamun iġegħluh iqim allat oħrajn ukoll. Taf x’jiġri meta Salamun jagħmel dan? Ma jibqax jittratta man-nies b’qalb tajba. Isir kattiv, u n-nies ma jibqgħux ferħanin.
Minħabba dan, Ġeħova jkun irrabjat maʼ Salamun, u jgħidlu: ‘Se niħodlok is-saltna u nagħtiha lil raġel ieħor. M’iniex se nagħmilha matul ħajtek, imma matul il-ħakma t’ibnek. Imma lil ibnek mhux se niħodlu n-nies kollha tas-saltna.’ Ejja naraw kif dan jiġri.