TÁ KÚMA̱NÍKA kuvi ta̱ David ni̱ka̱ʼa̱nra xíʼin ta̱ Salomón nda̱saa kúni̱ Ndióxi̱ ña̱ keʼéna veʼera. Tá xa̱ku̱a̱ʼa̱n ku̱mí ku̱i̱ya̱ xáʼndachíñu ta̱ Salomón saá ki̱xaʼára íxava̱ʼara ña̱ templo, ta ti̱xin u̱xa̱ ku̱i̱ya̱ sava ni̱xi̱nu ña̱yóʼo. Yáʼa 180,000 ta̱a i̱xava̱ʼaña, yaʼviní ka̱naña chi ku̱a̱ʼání oro xíʼin plata xi̱niñúʼuna xíʼinña.

U̱vi̱ cuarto náʼnu kúúmiíña, tá xi̱kaa ña̱ tabernáculo saá káaña. Soo náʼnuka ña̱yóʼo nu̱ú ña̱ kán, u̱vi̱ cuarto kán káʼa̱n iin iin ña̱yóʼo. Ta̱ Salomón, ini cuarto ma̱á chi̱ka̱a̱ra arca ña̱ trato ña̱ chi̱ka̱a̱ Ndióxi̱ xíʼin na̱ ñuu Israel. Ta savaka ña̱ʼa ña̱ ni̱xi̱yo ini tabernáculo inka cuarto ta̱ánraña.

Tá ni̱xi̱nu templo yóʼo keʼéna iin vikó káʼnu. Koto nu̱ú na̱ʼná yóʼo, ta̱ Salomón xi̱kuxítíra ini templo ta ni̱ka̱ʼa̱nra xíʼin Ndióxi̱. ʼNda̱a̱ ndiví kǒo nániña ña̱ koún nu̱úña Jehová, víʼikaví veʼe loʼo ña̱ i̱xava̱ʼi̱ yóʼo. Ndúkúi̱ ña̱ ma̱ní nu̱ún kuniso̱ʼo tá káʼa̱n na̱ ñuún xíʼún ini veʼe yóʼoʼ, káchi ta̱ Salomón xíʼin Jehová.

Tándi̱ʼi ni̱ka̱ʼa̱n ta̱ Salomón xíʼin Jehová, chí ndiví ki̱xi ñuʼu̱ ta xa̱ʼmiña kití tí xa̱ʼnína nu̱úra. Ta iin nda̱ye̱ʼe̱ ñuʼu̱ Jehová ini templo yóʼo. Ña̱yóʼo kúni̱ kachiña Jehová xi̱niso̱ʼovara ta ni̱kusi̱í-inira ña̱ i̱xava̱ʼana templo xíʼin ña̱ ni̱ka̱ʼa̱n ta̱ Salomón xíʼinra. Ta vitin su̱víka tabernáculo xíniñúʼuna, chi templo yóʼo kúú nu̱ú va̱xina ndásakáʼnuna Jehová.

Ku̱a̱ʼá ku̱i̱ya̱ viíní xa̱ʼndachíñu ta̱ Salomón nu̱ú na̱ ñuu Israel ta kúsi̱íkaví-inina. Soo ta̱ Salomón ti̱ndaʼa̱ra xíʼin ná si̱ʼí ná inka ñuu ná kǒo ndásakáʼnu Jehová. Koto nu̱ú na̱ʼná, yóʼo va̱xi iin ñá ndásakáʼnu inka ndióxi̱. Ta náyóʼo sa̱xinu̱ná-ini ta̱ Salomón ta ki̱xaʼára ndásakáʼnura inka ndióxi̱. ¿Á xíni̱ún ndáaña ku̱u vitin? Ta̱ Salomón ndu̱ura iin ta̱ ndi̱va̱ʼa-ini, ta na̱ ñuu Israel va̱ása ndóo si̱íkana.

Xa̱ʼa ña̱yóʼo ni̱sa̱a̱ Jehová xíʼin ta̱ Salomón, ta káchira xíʼinra: ʼVa̱ása taxikai̱ kaʼndachíñún, inkavana ndi̱ʼvi nu̱ún. Soo su̱ví ndi̱ku̱n kindai̱ chiñu ndaʼún, nda̱a̱ tá ná kixaʼá se̱ʼún kaʼndachíñura, saá kindai̱ña ndaʼa̱ra. Soo su̱ví ndiʼi na̱ yiví kindai̱ ndaʼa̱raʼ. Ná kotoyó ndáaña ku̱u.