NDAVITI tele kanda a ci tse, ua hele kuli Solomone vutumbe vua tambuile kuli Njambi vua ku tunga tembele ya Yehova. Mu muaka ua mu ciuana ua ku sika ceni, Solomone ua putuka ku tunga kaha ua i tungile mu miaka itanu na ivali na vingonde 6. Makumi a makulukazi a vamala va i tungile, kaha naua ha tembele ha ile zimbongo zia zingi. Muomu tembele yaco va i tungile na olu na palata.

Tembele ya kele na vihondo vivali, ngeci vize via kele mu tavenakulu. Vunoni vikevio via kama ku tuvakana via tavenakulu luvali. Solomone ua hakele cikasa ca litavasiano mu hondo ya  tembele, kaha viuma vikuavo via kele mu tavenakulu va na vi hake mu hondo ikuavo.

Omo tembele ya huile ku i tunga, vantu va pangele ciuano ca kama. Solomone ua tsikamene ha mavuli ku lutue lua tembele mu ku vundila, ngue mu u na mono ha fikula. Ua vundilile kuli Yehova ngueni: ‘Nga melu ka hasa ku ku kuata, ino tembele ya indende ngeci ka i hasa ku ku kuata na kumo kuahi. Vunoni, A Njambi yange, halakana ku vantu vove nga va vundila ku cihela cino’.

Solomone mua manene ku vundila, muilu mua fuma tuhia. Tua ku tsimika vikombelo via tusitu. Kaha tembele ya sulile na ceke ca ku fuma kuli Yehova. Eci ci ca muesele ngecize Yehova ua halakanene ku civundilo ca Solomone na tembele ya mu ile ku mutima. Kaha vantu va putukile ku lemesela ku tembele, kati naua ku tavenakulu.

Solomone ua sikile mua cili miaka ya ingi, kaha vantu va kele na ndzolela ya kama omo lia ku sika ceni. Vunoni Solomone ua putukile ku ambata vampuevo va ku vifuti vieka vaze ka ve ku lemesa Yehova. Ua mono umo ua vampuevo veni a li na ku lemesa kamponia, ni? Mu ku sulumuina vampuevo veni va mu tualele mu ku lemesa vanjambi veka. Ua tantekeya vika via mu Solokelele omo lia ku ka lemesa vanjambi veka? Ua likelele ku muesa ngozi ku vantu. Ua himpukile mukua vukenia ngeci vantu ka vesi naua na ndzolela.

Kaha Yehova ua nienguele cikuma na Solomone ngeci ua mu lekele ngueni: ‘Nji ka ku tambula vuangana na ku vu hia kuli yala ueka. Vunoni ka nji ka ci linga ku matangua ove, nji ka ci linga ku matangua a ku sika ca muanove. Vutuhu ngoco, ka nji ka tambula vantu vose va mu vuangana vueni’. Tu citale vati viendele.