Historia 64

Salomón kichijchiua teopan

IJKUAK David ximikiya, okimakak Salomón amatl kampa toTajtsin okijli kenon kipiya ika kichijchiuiliskej iteopan. Ijkuak kuikaya kanaj naui xiuitl kentla tekiuaj, Salomón peua kichijchiua teopan, niman uejkaui chikome xiuitl uan tlajko ika tlami. Melak miyekej tlakamej tekitij itech yejuin teopan, niman melak patioj kisa pampa notekitiltia oro iuan plata.

Teopan kipiya ome cuartos, ijkon ken tabernáculo. San ika, okpa ika uejueyimej katkaj, xijkon ken tabernáculo. Salomón kichiua makitlalikan caja tlen tetlalnamiktia tlajtolkaualistli, ipan yejon cuarto tlen onka tlaxomolko.

Ijkuak tlamij kichijchiuaj teopan, kichiuaj se ueyi iluitl. Salomón notlakuanketsa ixpan teopan ken nesi ipan tlaixkopinajli niman kichiua se teoyotl. ‘Tla ipan kech ika ueyi iluikak xonaki moueyilis’, Salomón kijlia Jehová, ‘kuakon, ¿kenon uelis onakis moueyilis ipan yejuin teopan? Oh noTajtsin, nimitstlajtlanilia xkaki mokalpan ijkuak uajlaskej nikan niman mitschiuiliskej teoyotl’.

Ijkuak Salomón tlami kichiua teoyotl, uajtemoua tlitl itech iluikak. Niman kintlatia nochi yolkamej tlen kiuentlaliaj. Kuakon itlauil Jehová melak petlani ipan nochi teopan. Yejuin kiteititia ika Jehová kikaktika, niman kuelita teopan tlen yokichijchiujkej niman kuelkaki iteoyouj Salomón. Aman israelitas peuaj kiueyichiuaj toTajtsin ipan teopan, xok ipan tabernáculo.

Uejkaujtipan Salomón otlayekan ika tlamachilistli, niman israelitas ika inyojlo nemij. San ika, Salomón nonamiktia iuan miyekej siuamej akin ualeuayaj itech oksekimej países, akin xkiueyichiuayaj Jehová. ¿Ueli tikita se siuatl akin kiueyichiujtika itajtsin? Kuakon yejuamej kichiuaj Salomón makinueyichiua tajtsitsintin. ¿Tikmati tlenon panoua aman? Salomón peua tetlajyouiltia, niman aman israelitas xuelij pakij.

Tlen kichiua Salomón, melak kikualania Jehová, kuakon kijlia: ‘Nimitskuilis tekiuajyotl niman okse nikmaktilis. Yejuin xnikchiuas amantsin, nikchiuas ijkuak mokoneuj tekiuajtitos. San ika, xnochimej tlaltikpakchanejkej nijkuilis mokoneuj’. Matikitakan kenon panoua yejuin.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.